25 jyl ótken soń óz tamyryn tanyp-bilý úshin Qazaqstanǵa oralǵan jigit Tengrinews.kz tilshisine óz oqıǵasyn baıandady.
AQSh-ta ósken ata-anasy oǵan Pol Sardar Bebkok degen esim berdi. “Sardar” esimi oǵan Qazaqstanda, perzenthanada berilgen. 20 jasynda ol óz bıologııalyq ata-anasyn izdeýdi bastaǵan, Al bıyl qańtar aıynda Almatyǵa kelip, qazir qazaq tilin úırenip júr.
AQSh-ta “Halyqaralyq qatynastar” mamandyǵy boıynsha oqyǵan ol, qazir týrıstik kompanııada taǵylymdamadan ótýde. Qazaq tilin úırenýdi ózine mindet sanaǵanymen, onyń óte qıyn ekenin moıyndaıdy.
- Qazaqstandy men óz Otanym dep esepteımin. Qazaq tilin úırenip jatyrmyn, óıtkeni bul men úshin mańyzdy. Balalyq shaǵymda meni asyrap aldy, sondyqtan Amerıkada óskende óz mádenıetimdi de, tilimdi de bilmedim. Qazir qazaq tili maǵan óte qıyn, biraq kóbirek kúsh salý kerek dep oılaımyn. Qaı elde tursań da, óz ana tilińde sóıleı bilý mańyzdy. Ony úırenýge tyrysyp jatyrmyn, biraq bul óte baıaý jáne qıyn júrip jatyr. Degenmen ýaqyt óte kele jetistikterge jetemin dep úmittenemin, – deıdi Pol Sardar.
Pol Sardardyń aıtýynsha, qazaqtar men amerıkalyqtardyń ómir súrý salty aıtarlyqtaı erekshelenedi. Qazaqtar otbasyǵa basa mán beredi, al amerıkalyqtar kóbinese jeke ómirge baǵyttalǵan. Qazaqstanda adamdar bastapqyda sýyq kóringenimen, jaqyn tanysqan soń óte qamqor bolady. Qazaqtar oıyn ashyq aıtady, al AQSh-ta mundaı tikeleı pikir aıtý ádetke saı emes. Sporttyq qyzyǵýshylyqtar da ártúrli: qazaqtar boks, kúres, fýtboldy unatady, al amerıkalyqtar amerıkalyq fýtbol men basketbolǵa jaqyn.
Pol bolashaqta qazaq qyzymen úılenip, balalaryn qazaq tilinde tárbıelegisi keledi. Qazaqstanda uzaq ýaqyt turyp, mádenıetin tereńirek túsinýdi qalaıdy. Sonymen qatar AQSh pen Qazaqstan arasynda jumys isteýge múmkindik beretin mamandyq tapqysy keledi.
Pol týǵan ata-anasyn bes jyldan beri izdep júr, biraq ázirge nátıje joq. Ol Tarazdaǵy balalar úıine baryp, jýrnalısterdiń kómegimen izdeý jumystaryn júrgizgen. Alaıda anasy ony ne sebepti tastap ketkeni jáne kezdesýge daıyn ba, ol jaǵy ba belgisiz. Soǵan qaramastan, ol ata-anasyn tabýdan úmitin úzbeı keledi.
