Baǵdarlamanyń alǵashqy shyǵarylymynda eki jetekshi joǵary oqý orny – Narhoz ýnıversıteti men Manash Qozybaev atyndaǵy Soltústik Qazaqstan ýnıversıtetiniń stýdentterinen quralǵan qos komanda ózara pikir talastyrdy.
Joba elimizdegi 100-den astam joǵary oqý ornynyń ishinen iriktelgen 32 ýnıversıtet komandasy arasynda ótedi. Týrnır olımpıadalyq júıe boıynsha uıymdastyrylyp, jeńgen komanda kelesi kezeń – 1/8 fınalǵa ótedi. Dúnıejúzilik Toǵyzqumalaq Federasııasynyń prezıdenti Álıhan Baımenov, «Kókpar» federasııasynyń prezıdenti, Májilis depýtaty Aıdarbek Qojanazarov, Ulttyq jáne at sport túrleri ortalyǵy dırektorynyń mindetin atqarýshy Qarlyǵash Ramazanova, dástúrli sadaq atýdan kóshpendiler oıynynyń jeńimpazy Baqbergen Sálimov, Qazaq Debate qozǵalysynyń negizin qalaýshy Erbolat Muhamedjan bastaǵan azamattar qazylyq etti.
Pikirsaıys barysynda Narhoz ýnıversıtetiniń ókilderi ulttyq sportty damytýdaǵy naqty jetistikterge toqtaldy: 2023 jyly elimizde 113 jańa sport nysany salynǵanyn, sondaı-aq 26 nysannyń jańǵyrtylǵanyn atap ótti. Sonymen qatar, Ulttyq sport ýnıversıtetiniń qurylysy da kóterildi. Olar ulttyq sportty halyqaralyq deńgeıge shyǵarý úshin ortaq ereje men júıe qajet ekenin basa aıtty.
Qarsy tarap ulttyq sport pen ulttyq oıyndardyń arajigin naqty ajyratyp, sportty buqaralyq sıpatqa aınaldyrý qajettigin alǵa tartty. Olar Ortalyq Azııada júrgizilgen saýalnama nátıjesine súıenip, respondentterdiń 30%-y fýtboldy kóretinin, al nebári 3,8%-y ǵana ulttyq sportty tańdaǵanyn mysal etti.
Qazylar sheshimimen jeńiske jetken Narhoz stýdentteri ulttyq sport tek tarıhı mura emes, bolashaqtyń mańyzdy bóligi ekenin dáleldep shyqty. Olar onyń erejelerin zaman talabyna saı, túsinikti ári tartymdy etý qajet ekenin jetkizdi.
Atalǵan jobany júzege asyrýǵa QR Parlamenti Májilisi, Mádenıet jáne aqparat mınıstrligi, sondaı-aq Ǵylym jáne joǵary bilim mınıstrligi qoldaý bildirdi.
