Naqtyraq aıtsaq, jadaǵaı, ishik, beshpet, ton, kájekeı, qos etek kóılek, búrmeli kóılek, taqııa, sáýkele, bórik, shońqaıma etik kıip, teńiz jaǵalaýynda sap qurǵan 5 myń adam «Qazaq ulttyq kıimimen bas qosqan eń kóp adam» atalymy boıynsha Gınness rekordyn ornatty.
«Best Fest Nauryz» ataýymen ótken sharaǵa tirkelýshiler az bolǵan joq, áıtse de tek solardyń arasynan 5 myń adam ǵana qazaq halqynyń mádenı murasyn álemdik deńgeıde nasıhattaýǵa óz úlesin qosýǵa múmkindik aldy. Olardyń qatarynda túrli sala mamandary, etnos ókilderi, qarııalar, sondaı-aq óńirdiń shalǵaı aýyldary men elimizdiń ózge oblys, qalalarynan arnaıy kelgen turǵyndar da bar. Erli-zaıyptylar, ene men kelin, anasy men qyzy syndy juptasyp kelgender de bar.
Tirkeýden ótken qatysýshylar arnaıy jasaqtalǵan alańǵa jınalyp, Ulybrıtanııadan kelgen Gınnestiń rekordtar kitabynyń resmı ókilderi esep júrgizdi. Birneshe saǵatqa sozylǵan sanaý nátıjesinde qoıylǵan talaptardyń tolyq oryndalǵany rastalyp, elimizdiń jańa álemdik rekord ıesi atanǵanyn dáleldeıtin arnaıy sertıfıkat tabystaldy. Jańbyrly kúnniń teńiz jaǵalaýyndaǵy lebi salqyn boldy, alaıda ulttyq kıimmen jaınań qaǵyp, kúlimdegen qalyń adamnyń kóńil kúıi men patrıottyq sezimi tońý men alańdy tastap ketýge jol bergen joq. Qatysýshylar saǵattap turyp, sanaqtyń sátti aıaqtalýyna bir kisideı atsalysty.
Birneshe saǵatqa sozylǵan is-shara nátıjesinde rekord sertıfıkatyn qabyldap alǵan Mańǵystaý oblysynyń ákimi Nurdáýlet Qılybaı bul tarıhı oqıǵanyń ultymyzdyń mádenı murasyn halyqaralyq deńgeıde tanytýdaǵy mańyzyn aıtyp, jınalǵandardy Ulystyń uly kúnimen quttyqtady.
«Ulystyń uly kúninde tarıhı sáttiń kýási bolyp otyrmyz. Qazaq halqynyń tereń tarıhy men baı mádenı murasyn, ulttyq dástúrimizdi jer-jahanǵa pash ettik. Mańǵaz Mańǵystaýymyzda qazaqtyń ulttyq kıiminen álemdik rekord ornady. Osynaý zor jetistikpen barsha otandastarymyzdy quttyqtaımyn! Qazaq halqynyń mádenıetin nasıhattaýǵa atsalysqan bastamashy topqa, London qalasynan arnaıy kelgen Gınnestiń rekordtar kitabynyń ókilderine jáne rekord ornatýǵa úles qosqan barsha qatysýshyǵa alǵys bildiremin!
Memleket basshysy Qasym-Jomart Kemeluly Toqaev Býrabaıda ótken IV Ulttyq quryltaıda ulttyq biregeıligimizdi nyǵaıtý jolynda Naýryz meıramynyń orny aıryqsha ekenin atap ótti. Prezıdentimizdiń bastamasymen Naýryz merekesi týraly jańa tujyrymdama ázirlendi. Elimiz Ulystyń uly kúnin 14 naýryzdan, ıaǵnı Amal merekesinen bastap 10 kún boıy atap ótedi. Kún menen tún teńelip, Jer-ana jańa kúıge enip, tirshilik ataýly oıanyp, aınala máre-sáre bolatyn Ulystyń uly kúni –jyl bastaýy áz-Naýryz barshańyzǵa qutty bolsyn, aǵaıyn!» dedi óńir basshysy Nurdáýlet Qılybaı.
Mańǵystaý oblysy ákimine arnaıy sertıfıkatty tabystaǵan Gınnestiń rekordtar kitabynyń resmı ókili Rıchard Stennıng qazaq halqyn tamasha nátıjege qol jetkizýimen quttyqtady.
«Qurmetti qazaqstandyqtar, halqyńyzdyń basty merekesi – Naýryz meıramynda rekord jasadyńyzdar. Búgin qazaq eliniń salt-dástúrge berik ekenine, rýhty, talǵamy joǵary halyq ekenine kýá boldym. Is-shara da óte joǵary deńgeıde uıymdastyrylǵan. Tarıhı oqıǵa jasaýlaryńyzben shyn júrekten quttyqtaımyn», dedi ol.
Ulttyq kıim ult mereıin kóterdi. Sandyqta jatqan 50–70 jyl burynǵy, áke-sheshe, ata-ájeleri tikken, kıgen kıimderin kıip shyqqan qatysýshylar da, is-sharany tamashalaýshylar da máz.
«Is-sharaǵa anammen birge bardym. Kóneniń kózi anam – qoly usynaqty, sheber adam. Keshegi kúni qýanyshy qoınyna syımady deýge bolady. Kún salqyn bolsa da, ádemi, sapaly, tabıǵı kıim men mańyzdy is-sharanyń áserinen tońǵanymyz joq. Saltanat joǵary deńgeıde ótti, qazaqtyń kıimi álemdik rekord ornatyp, mártebemizdi arttyrdy. Halqymyzdyń, ulttyq kıimimizdiń abyroıyn asyrǵan tarıhı oqıǵaǵa qatysyp, sál de bolsa úlesimdi qosqanyma qýanamyn», deıdi qatysýshy ustaz Shynar Túıeshıeva.
Is-shara Mańǵystaýda ótkenimen, Gınnestiń rekordtar kitabyna engen – qazaqtyń ulttyq kıimi. Ortaq qýanyshqa el bolyp qýaný jarasymdy.
Mańǵystaý oblysy
