Qazirgi tańda Albına Bóketov atyndaǵy ýnıversıtette jýrnalıstıka mamandyǵy boıynsha bilim alyp júr. Áńgime barysynda ol jýrnalıstıkaǵa qyzyǵatynyn, túrli saıystarǵa qatysyp, osy jolda ózin shyńdap kele jatqanyn aıtty.
«Qazir oqýymdy tolyqtaı ıgerip, bilikti maman bolýdy kózdeımin. Sonymen qatar, ártúrli konkýrstarǵa qatysyp, ózimniń sheberligimdi arttyrýǵa tyrysamyn. Áleýmettik jeli arqyly oılarymdy, kózqarasymdy bólisip, qoǵammen baılanys ornatýǵa da kóp kóńil bólemin. Instagramda belsendimin, oqyrmandarymmen efırge shyqqandy unatamyn», deıdi ol.
Albınanyń ákesi ulty tatar bolǵanymen, qazaq tárbıesinde ósken. Balalarymen kishkentaı kezinen bastap tek qazaq tilinde sóılesken. Sondyqtan Albına da boıyna qazaq tárbıesin, mádenıetin sińirip ósken.
«Otbasym úlken ári berik. Ákem – Vıtalıı, anam – Natalıa, olar mal sharýashylyǵymen aınalysady. Anam sút ónimderin óndiredi, óz jerimiz ben jaıylymymyz bar. Bizdiń otbasymyzda qazaqı dástúrler erekshe oryn alady. Mysaly, «Qonaq kelse, qut keledi» jáne «Amanshylyq bolsyn» degen sózder maǵynaly ári mańyzdy. Ata-anam maǵan óte kóp ómirlik qundylyqtardy úıretip keledi», deıdi Albına.
Sondaı-aq slavıan qyzy orys tilinde sóıleý oǵan qıyndyq týdyratynyn, orys tilin endi úırenip júrgenin, tilin jetildirý úshin kóp oqyp, tájirıbe jınap júrgenin aıtyp ótti.
Albına ózin qazaqtyń qyzy dep sanaıdy, sebebi onyń júreginde qazaqtyń rýhy men mádenıetine degen tereń mahabbat bar. Bul – tek sózben aıtatyn uǵym emes, ol ómiriniń negizine aınalǵan shynaıy sezim. Qazaq tilinde erkin sóılep, osy tilde oılaryn ashyq bildirý ol úshin tabıǵı nárse. Ol qazaqtyń salt-dástúrlerin, ulttyq qundylyqtaryn júregine jaqyn ustap, sol arqyly óz ómirin baıytýdy maqsat etedi.
«Iá, ózimdi qazaqtyń qyzy sanaımyn, sebebi osy mádenıette tárbıelendim. Tilim de, qundylyqtarym da – qazaqy. Bul men úshin jaı sezim emes, ómirimniń bóligi. Qazaqı salt-dástúrlerdi de boıyma sińirip ósip kelemin. Maǵan ásirese tusaýkeser men betashar dástúrleri erekshe unaıdy», deıdi ol.
Albına qazaq ádebıetine erekshe qurmetpen qaraıdy. Muqaǵalı Maqataevtyń óleńderinen bastap, Maǵjan Jumabaev pen Oralhan Bókeıdiń shyǵarmalaryna deıingi árbir sóz, árbir shýmaq onyń júregine áser etedi.
Sonymen qatar, ol tek qazaqsha sóılep qana qoımaı qazaq tilinde óleń-joldaryn jazatynyn aıtyp ótti.
«Anamnyń boıynda aqyndyq qasıet bar. Ol Abaı óleńderin súıip oqıdy, jas kezinde jarystarǵa qatysyp, óleń jazǵan. Múmkin, shyǵarmashylyqqa degen qyzyǵýshylyǵym anamnan daryǵan shyǵar», deıdi jas qyz.
Albına úshin qazaq tilin bilý tek tildik daǵdy emes, onyń ómirindegi úlken artyqshylyqtardyń biri. Qazaq tilinde sóıleý oǵan aınalasyndaǵy adamdarmen tereń ári shynaıy baılanys ornatýǵa múmkindik beredi.
«Qazaq tilin bilý maǵan adamdarmen erkin qarym-qatynas jasaýǵa, mádenıetti tereń túsinýge jáne kásibı múmkindikterimdi keńeıtýge kómektesedi. Bul – meniń bolashaǵym úshin úlken artyqshylyq. Qazaqsha úırený úshin qoryqpaı sóıleý, kitap oqý, tyńdaý jáne kúndelikti qoldaný mańyzdy. Eń bastysy úzdiksiz tájirıbe kerek», deıdi ol.
