Foto Bigandt
Al... bir kezderi ózi jat kóretin qaýymǵa erip, azanshysy men qazanshysy damaılasqan tirliktiń jarapazanshylarymen án shyrqapty. Eń tunjyr, eń ókinishti kúnder... Bar bolyp kórinýge tyrysypty. Kimge kórinbek edi? Kimge sóılemek edi? Ol ózin sórede turǵan bir kitap qanamyn dep elestetpeýshi me edi? Nege myńjyldyqtarǵa emes, arzan qoǵamǵa unaýǵa talpynǵan? Nege ultqa emes, qoǵamǵa til qatqan?
Qos-qos jup, qos-qos japyraqtar. Jalǵyz qalýdan qorqatyn ómirsúıgish kórermender. Kóshe boıyndaǵy oryndyqqa otyra ketti ol. Kenet ishki jaǵynan bireý sóılegendeı boldy. Qarasa óziniń jany, tilingen jany pııazǵa qaraǵan janardaı syzdaǵanyn baıqady. Dertti jan kúrk-kúrk jótelip til qatty. «Taldan taıaq taıanǵan sol bala, sábı jan men edim ǵoı... móldir oıdyń baqshasynda qulash urǵan kezim qaıda? Mendegi alǵash tutanǵan otty máńgilik sóndirmeı ótemin degen ańsarly tilegiń myzǵyǵany ma? Esińde me, alǵash kórpeniń astyna enip, anam ólse ne isteımin, qalaı ómir súremin dep oısha anańnyń ólgenin elestetip jylaǵan ediń ǵoı... Sosyn bozala qyrdyń basynda óskende jaqsy adam bolyp, kún sııaqty álemge jaryq shashamyn dep sert etip ediń. Túnde jábirlengish, áljýaz qoıan týraly ertegi aıtylǵanda «Ol nege jylaıdy? Nege qorǵansyz?» dep muńǵa batýshy ediń. Al qazir qandaısyń? Eshnársege selt etpeıtin bolyp bara jatqanyń qalaı?...»
Jalǵyzdyq kóshe boıyna damyldap, tynym aldy. Bári bóten kórinedi, bári ózgerip ketkendeı.
