Foto: Týrızm jáne sport mınıstrligi
Máýlen Áshimbaev elordada atalǵan sport ortalyǵyn salý ádiletti memleket qurý jolyndaǵy mańyzdy qadam ekenin atap ótti.
«Prezıdentimiz Qasym-Jomart Kemeluly Toqaev árbir azamattyń damýyna jáne óz áleýetin júzege asyrýyna jaǵdaı jasalǵan ádiletti qoǵam qurýdyń mańyzdy ekenin únemi aıtyp keledi. Jańa Inklıýzıvti sport ortalyǵy múgedektigi bar sportshylardyń alańsyz jattyǵý jasaýyna, halyqaralyq jarystarǵa daıyndalýyna jáne jańa bıikterdi baǵyndyrýyna jol ashatyn orynǵa aınalady dep senemiz. Munda bochcha, basketbol, arbamen oınaıtyn fýtbol, golbol, otyryp oınaıtyn voleıbol jáne taǵy basqa sport túrlerine arnalǵan zaldar bolady. Bul qadam sportshylarymyzǵa halyqaralyq jarystarǵa joǵary deńgeıde daıyndalýǵa múmkindik beredi», dedi Máýlen Áshimbaev.
Sonymen qatar Senat Tóraǵasy mundaı ortalyqty salý tek sporttaǵy jetistikterge ǵana yqpal etip qoımaı, ár azamattyń ómirden óz ornyn tabýyna, kóppen aralasyp, qarym-qatynas jasaýyna jáne bir-birin qoldaýǵa beriletin zor múmkindik ekenin aıtty. Munyń bári – múgedektigi bar balalardy úlken ómirge beıimdeýdiń jáne qoǵamda durys qundylyqtar júıesin dáripteýdiń tıimdi tetigi.
Sondaı-aq Máýlen Áshimbaev jobany iske asyrýǵa uıytqy bolǵan Astana qalasynyń ákimdigine jáne ınklıýzıvti sportty damytýǵa, parasportshylarǵa jaǵdaı jasaýǵa atsalysyp júrgen belsendi azamattarǵa alǵys aıtty.
Saltanatty rásimge Astana qalasynyń ákimi Jeńis Qasymbek, Týrızm jáne sport vıse-mınıstri Serik Jarasbaev, parasport federasııalarynyń basshylary men músheleri jáne taǵy basqa múddeli taraptar qatysty.
