Qaraǵaıly yqsham aýdanynda salynǵan №51 bilim ordasynyń ashylý saltanatyna oblys ákimi Berik Ýálı, «Samuryq Qazyna konstrakshn» AQ basqarma tóraǵasy Máýlen Aımanbetov, bilim salasynyń ardagerleri, aqsaqaldar jáne ata-analar qatysty.
Oblys ákimdiginiń baspasóz qyzmetiniń dereginshe, jańa da jaıly mektepte oqýshylardyń jan-jaqty bilim alýyna barlyq jaǵdaı jasalǵan. Zamanaýı jabdyqtarmen tolyq qamtamasyz etilgen bilim ordasynda 65 synyp-komplekt bar. Onyń ishinde eki mektepaldy daıarlyq synyby jumys isteıdi. Mektepte 100-ge jýyq pedagog eńbek etedi.
Jańa mektep 33 oqý kabınetimen qatar, úsh ınformatıka kabıneti, robototehnıka synyby, STEM zerthanasy, grafıka jáne modeldeý, mýltımedıa, vızýaldy óner pándik kabınetterimen jabdyqtalǵan. Sondaı-aq «úı mádenıeti» men «tamaqtaný mádenıeti» sheberhanalary qarastyrylǵan. 250 oryndyq akt zaly, 338 oryndyq ashana, resýrstyq ortalyq pen kitaphana, eki sport zaly, eki fýtbol alańy oqýshylardyń shyǵarmashylyq, ıntellektýaldyq, sporttyq turǵydan damýyna múmkindik mol.
Aımaq basshysy jańa mekteptiń ashylý saltanatynda sóılegen quttyqtaý sózinde bilim ordasynyń Qaraǵaıly yqsham aýdany úshin ǵana emes, qala turǵyndary úshin mańyzy zor ekenin aıtty.
«О́zderińiz jaqsy bilesizder, Memleket basshysy óz Joldaýynda «Árbir oqýshynyń bilim alyp, jan-jaqty damýy úshin qolaıly jaǵdaı jasalýǵa tıis» dep «Jaıly mektep» ulttyq jobasyn júzege asyrýdy tapsyrǵan bolatyn. Búgin, mine, osy joba aıasynda Abaı oblysyndaǵy alǵashqy mektepti paıdalanýǵa berip jatyrmyz. Oqýshylar men ata-analar bul kúndi asyǵa kútti. Biz de ákimdik tarapynan mektepterdiń tezirek, tórtinshi toqsanda paıdalanýǵa berilýine kúsh saldyq. Buǵan deıin qalanyń basqa mektepterine qatynap oqyǵan oqýshylarǵa tamasha tartý jasadyq dep oılaımyn. Bilim ordasynyń barlyq ustazdary men oqýshylaryna úzdik jetistikter men jarqyn bolashaq tileımin. Jańa da jaıly mektep qutty bolsyn», dedi oblys ákimi.
Aımaq basshysynyń aıtýynsha, oblysta «Jaıly mektep» ulttyq jobasy aıasynda 5 mektep salý josparlanǵan, jańa oqý jylynda Semeı qalasy men Aıagóz qalasynda taǵy eki bilim ordasy paıdalanýǵa beriledi.
Oblys ákimi ashylý saltanatynan soń qonaqtarmen birge mekteptiń kabınetteri, kitaphanasy, zerthanalaryn jáne sheberhanalaryn aralap, sport zaldary men fýtbol alańyn kórdi. Oqýshylarmen, muǵalimdermen pikirlesip, jańa mekteptegi jańa qadamdaryna sáttilik tiledi.
Oqýshylardyń ata-analary jańa yqsham aýdannyń ekinshi mekteppen tolyqqanyna rızashylyqtaryn jetkizdi.
«Jańa mekteptiń salynýy Qaraǵaıly turǵyndarynyń kópten bergi armany edi. Yqsham aýdannyń ata-analary balalaryn qalanyń túkpir-túkpirindegi mektepterge túrli kólikpen tasyp, qınalyp júretin. О́ıtkeni, Qaraǵaılyda jalǵyz ǵana mektep boldy. Búgin osy másele sheshimin taýyp, qýanyshqa bólenip otyrmyz. Jańa mektepte oqýshylarǵa ne kerektiń bári bar. Barlyq jaǵdaı jasalǵan. Osyndaı mektep salyp bergeni úshin Prezıdentimizge alǵys aıtamyz», dedi Qaraǵaıly yqsham aýdanynyń turǵyny Baqtyly Qanafına.
Budan keıin aımaq ákimi Berik Ýálı, «Samuryq Qazyna konstrakshn» AQ basqarma tóraǵasy Máýlen Aımanbetov Besqaraǵaı aýdanyndaǵy «Jaıly mektep» ulttyq jobasy aıasynda salynǵan 300 oryndyq mekteptiń ashylý rásimine qatysty. Saltanatty jıynǵa bilim salasynyń ardagerleri jáne ata-analar qatysty.
Onda da oqýshylardyń jan-jaqty bilim alýyna barlyq jaǵdaı jasalǵan. Zamanaýı qural-jabdyqtarmen qamtylǵan oqý ornynda qazir 57 muǵalim eńbek etedi. 22 oqý kabıneti, mýltımedıalyq jáne jaratylystaný-ǵylymı pánderge arnalǵan zerthanalar, sport jáne shyǵarmashylyq úıirmeleri jumys isteıdi. 120 oryndyq ashana, 100 oryndyq májilis zaly, ınteraktıvti panelder, pándik kabınetter, kitaphana, oqý zaly bar. Sportpen shuǵyldanýǵa arnalǵan zaldar men ashyq alańdar, vorkaýt aımaqtary, dombyra úıirmesi sııaqty qosymsha bilim berý baǵyttary qarastyrylǵan. Erekshe bilim berý qajettilikteri bar balalarǵa arnalǵan ınklıýzıvti orta da eskerilgen: pandýstar, taktıldi joldar, arnaıy sanıtarlyq toraptar ornatylǵan.
Aýdan ortalyǵyndaǵy Qaırat Rysqulbekov atyndaǵy orta mekteptiń oqýshylary buǵan deıin balabaqshaǵa beıimdelgen ǵımaratta oqyp kelse, endi olar jańa mektepke bilim alady.
Aımaq basshysy mekteptiń ashylý saltanatynda sóılegen quttyqtaý sózinde bilim ordasynyń Besqaraǵaı aýylynyń turǵyndary úshin mańyzy zor ekenin jetkizdi.
«Memleket basshysy atap ótkendeı, árbir oqýshynyń sapaly bilim alýyna memleket tarapynan qazirgi tańda barlyq jaǵdaı jasalyp jatyr. «Jaıly mektep» jobasy el ıgiligine, bilim men ǵylymdy shyńdaýǵa baǵyttalǵan baǵdarlama. Búgin, mine, oblysymyzda eki birdeı jańa mektep paıdalanýǵa berildi. Bul oqýshylar úshin, ata-analar úshin, muǵalimder úshin úlken mereke, aıtýly kún. Biz bul baǵyttaǵy jumysty jalǵastyra beremiz. О́ńirdegi mektepter kezeń-kezeńmen jańǵyryp, jańartylady», dedi oblys ákimi.
Aımaq basshysy ashylý saltanatynan keıin qonaqtarmen birge mekteptiń kabınetteri, kitaphanasy, zerthanalaryn jáne sheberhanalaryn aralap, sport zaldary men fýtbol alańyn kórdi. Oqýshylarmen, muǵalimdermen pikirlesip, jańa mekteptegi jańa bastamalarǵa sáttilik tiledi.
ABAI OBLYSY
