Shahmat • 02 Sáýir, 2025

Joldama Almatyda sarapqa salynady

26 ret

kórsetildi

2 mın

oqý úshin

2-10 sáýir aralyǵynda Almaty qalasynda shahmattan Azııa aımaǵy boıynsha álem kýboginiń irikteý týrnıri ótedi. Oǵan elimizden bólek, О́zbekstan, Qyrǵyzstan, Túrikmenstan, Tájikstan, Aýǵanstannan kelgen 136 (94 erler, 42 áıelder) oıynshy qatysady.

Ǵalym SÚLEIMEN

Osydan eki jyl buryn Tájikstannyń bas shahary – Dýshanbede uıymdastyrylǵan irikteý saıystarynda nebári úsh joldama sarapqa salynǵan edi. Ol kezde jerlesterimiz Ásel Serikbaı men Álisher Súleımenov, ózbekstandyq Nodırbek Iаkýbboevtyń baǵy janyp, álem kýbogine qatysý quqyǵyn jeńip aldy. Bıyl lısenzııalar sany jetige jetip otyr. Almatydaǵy jarystyń qorytyndysy boıynsha Nıý-Delıdegi dodaǵa (1-26 qarasha) tórt jigit qatyssa, úzdik shyqqan úsh qyz Batýmıdegi básekede (5-29 maýsym) baq synaıdy.

Jarystyń júlde qory 20 000 AQSh dollaryn quraıdy. Erler men áıelder arasyndaǵy jarystyń jeńimpazdary 3 myń dollardan ıelense, ekinshi, úshinshi oryn alǵandarǵa 2,5 myń men 1,5 myń dollar tıesili. Sondaı-aq tórtinshi (1,2 myń dollar), besinshi (1 myń dollar), altynshy (800 dollar) oryn alǵandarǵa da syıaqy beriledi.

Elimizdiń týy astynda erler arasynda Qazybek Nógerbek (GM, 2530 upaı), Álisher Súleımenov (GM, 2484), Ramazan Jalmahanov (GM, 2482), Jandos Aǵmanov (IM, 2469), Arystanbek Orazaev (IM, 2467), Edgar Mámedov (IM, 2456), Azamat О́teǵalıev (IM, 2456), áıelder saıysynda Merýert Kamalıdenova (IM/WGM, 2355), Alýa Nurman (WGM, 2336), Lııa Kurmanǵalıeva (FM/WGM, 2272), Ksenııa Balabaeva (WGM, 2270), Elnaz Qalıahmet (WGM, 2241), Ásel Serikbaı (WIM, 2235), Aıaýlym Qaldarova (WFM, 2204), Zarına Nurǵalıeva (WFM 2178) óner kórsetedi.

О́zbekstan quramasy da óziniń myqty shahmatshylaryn Alataý baýraıynda ákele jatyr. Atalǵan týrnırde baq synaıtyndar arasynda Muhıddın Madamınov (GM, 2550), Ábdimálik Ábdisálimov (GM, 2525), Ortık Nıgmatov (GM, 2501), Muhammadzohıd Sýıarov (IM, 2474), Saıdakbar Saıdalıev (M, 2461), Afrýza Hamdamova (WIM, 2350), Ýmıda Omonova (WIM, 2242) syndy sheberler bar. Sondaı-aq Túrikmenstannyń sapyndaǵy Saparmurad Atabaevty da (IM, 2529) erekshe atap ótýge bolady.