- Shveısarııanyń Engadın qalasynda frıstaıl-akrobatıkadan álem chempıonaty bastaldy. Jarystyń alǵashqy kúni Aıana Joldas, Dinmuhammed Raıymqulov, Asan Asylhan aralas komandalyq saıysty jetinshi orynmen qorytyndylady. Bas júlde AQSh-qa buıyrdy, kúmis pen qola medaldi Ýkraına men Shveısarııa enshiledi.
- Germanııanyń Shtýtgart qalasynda ótken týrnırde gımnast Zeınolla Ydyrysov asqan sheberligimen kózge tústi. «At» jattyǵýynda 14,066 upaı jınap, bas júldeni oljalady. Ekinshi, úshinshi oryndardy ıtalııalyq Edoardo De Rosso (13,966) men japonııalyq Rıosýke Doıge (13,766) ıelendi.
- Elimizdiń tennısshisi Dmıtrıı Popko Meksıkanyń Morelııa qalasynda ótken ATP Challenger 125 týrnırinde top jardy. Álemdik reıtıngte 245-orynǵa turǵan jerlesimiz fınalda tizimde 95-satyǵa jaıǵasqan Aýstralııanyń ókili Djeıms Dakvortty utty. 1 saǵat 47 mınýtqa sozylǵan saıys 1:6, 6:2, 6:4 esebimen aıaqtaldy. Báseke barysynda D.Popko segiz eıs jasap, alty breık-poınttyń úsheýin sátti paıdalandy.
- Fýtzaldan jastar arasyndaǵy Eýropa chempıonatynyń (U-19) irikteý týrnırinde elimizdiń quramasy Fransııaǵa ese jiberdi. Portýgalııada ótken match 1:3 esebimen aıaqtaldy. Jeńimpazdar qatarynan Iýnes Oýbrık, Eıýbe Mohamed Adam, Elıott Kolskı gol soqsa, jerlesterimizdiń arasynan Álázız Kamalov mergendik tanytty. Paýlo Rıkardo Kaka jattyqtyratyn komanda búgin Portýgalııamen kezdesedi, erteń Belarýske qarsy oınaıdy.
