Ǵylymı konferensııaǵa elimizdiń túkpir-túkpirinen kelgen ǵalymdar men qaıratkerler Táshenovtiń eli úshin jasaǵan erligi, jeri úshin qabyldaǵan batyl sheshimi jóninde sóz qozǵady.
– Jumabek Ahmetuly óziniń saıası kúresi men qaıyspas erik-jigeri arqyly elimizdiń shekarasyn qorǵap, memlekettik tutastyqty kózdiń qarashyǵyndaı saqtaýǵa, halqymyzdyń mádenıeti men tilin damytýǵa aıanbaı eńbek etken tulǵa. Arqa jerinde J.Táshenovke arnalǵan tanymdyq is-sharalar jyl saıyn ótedi. Onyń ishindegi aýqymdysyn J.Táshenov atyndaǵy júlde der edik. Sonymen qatar Qaraǵandy qalasynyń №54 mektebine Jumabek Ahmetulynyń esimi berilgeni de kóńil qýantady. Osyndaı ıgi is-sharalardyń ótkizilýine muryndyq bolyp, basy-qasynda júrgen, ártarapty qoldaý kórsetken barlyq azamattarǵa, onyń ishinde rýhanııat janashyry Aıtbaı Jumaǵulǵa alǵysymdy bildiremin, – dep lebiz bildirgen oblys ákiminiń orynbasary Álibek Áldeneı konferensııany resmı ashyp berdi.
Asyldyń synyǵy, tektiniń tuıaǵy Saıan Jumabekuly ákesiniń ónegeli jolyn áńgimelemes buryn, ult batyrynyń esimin ardaqtap jatqan Arqa jurtyna alǵysyn bildirdi.
«Qaraǵandy – meniń ata-babamnyń týǵan jeri. Ákemniń túp-tamyry osy jerden bastaý alady. Sondyqtan bul el maǵan ystyq. On bes jasymda ákemnen: «Men nege bastyqtyń balasymyn? Nege erkin, jurt qatarly kerzi etikpen júre almaımyn?», dep suradym. Jaýaby áli esimde. «Eger sen ózgelerden erekshe bolǵyń kelse, tek aqylyńa júgin, kıimmen bólektený aqyldynyń isine jatpaıdy» degen bolatyn. Mine, sol sózi ómirlik qaǵıdama aınaldy. Bizdiń úıimiz oqý ýaqytynda stýdentter jataqhanasy tárizdes yǵy-jyǵy bolatyn. Bilim alýǵa umtylǵan órenderdiń betin qaıtarmaı, úıge jatqyzýynyń ózi baýyrmaldyqtyń óshpes úlgisindeı. Ákemniń aı saıynǵy alatyn jalaqysy úıge qajetti turmystyq zattarǵa, tamaq shyǵynyna, ózge de qajettilikterge jumsalatyn. Salym aqsha nemese bolashaqta kerek bolyp qalady-aý degen maqsatpen qosymsha tabys kózi bizde atymen bolǵan emes. Ákem jumystan bosaǵanda kórpe-tósegimizden ózge bizde eshnárse qalmady, óleń tósegimizge balaıtyn óz páterimiz de, arqamyzdy keńge salýǵa jaraıtyn dúnıe-múlkimiz de bolmady. Basymyzdaǵy baspanamyz da ákemniń qyzmetimen birge ketti. О́ziniń emes, eldiń qamyn oılaǵandyǵy búginde ańyzǵa aınaldy», degen ulynyń esteliginen ákege degen saǵynyshtyń lebi esti.
Alǵash baıandama jasaǵan L.N.Gýmılev atyndaǵy Eýrazııa ulttyq ýnıversıtetiniń professory, fılologııa ǵylymdarynyń doktory Serik Negımov qaıratker tulǵanyń bes birdeı oblysty aman alyp qalǵany jóninde áńgimeledi.
«Ar-namystan jaralǵan ótkir zeıindi oǵlan, oı-parasat ıesi Jumabek Táshenovtiń «Nıkıta Sergeevıch, eger Joǵarǵy Keńes ár respýblıkanyń jerlerin jergilikti oryndarsyz sheshe beretin bolsa, KSRO-nyń jáne ult respýblıkalarynyń konstıtýsııasyn joıý kerek qoı. Al ol Konstıtýsııalarynyń zańdarynda ár ult respýblıkasy óziniń tarıhı jerin, ondaǵy tabıǵı baılyǵyn óz menshigim dep paıdalanýǵa quqyǵy bar. Ony ózgertýge eshkimniń, eshbir organnyń quqyǵy joq», degeni – kózsiz batyrlyq!» dep oıyn túıindedi ǵalym.
Parlament Májilisiniń depýtaty Nurlan Áýesbaev Táshenovtiń máńgilik murasyna aınalǵaly turǵan kitapqa qutty bolsyn aıtty.
«Tulǵataný» ǵylymı-zertteý ortalyǵynyń dırektory, professor Nursahan Beısenbekova J.Táshenovtiń qoǵamdyq saıası qyzmeti jóninde, tarıh ǵylymdarynyń kandıdaty Qanat Eńsenov Ońtústik Qazaqstan aýdandary úshin kúresi týrasynda baıandama jasady.
Táshenovtanýshy Erekbolat Qabylda, pedagogıka ǵylymdarynyń kandıdaty Jabaı Qalıev, fılologııa ǵylymdarynyń kandıdaty Qaıyrbek Kemeńger, fılologııa ǵylymdarynyń kandıdaty Sarjan Takırov baıandamalarynda Jumabek Ahmetulynyń tarıhı tulǵasyn jan-jaqty ashty. Taý tulǵanyń saıası qyzmetin Alash ıdeıasymen sabaqtastyrdy. Kórkem ádebıettegi Táshenovtiń beınesi jóninde de sóz qozǵaldy.
Konferensııa sońyn Shahmet Qusaıynov atyndaǵy Aqmola oblystyq Qazaq mýzykalyq-drama teatry Qazaqstannyń halyq ártisi, belgili dramatýrg Ersaıyn Tóleýbaıdyń «Aldaspan» dramasymen túıindedi.
Qaraǵandy oblysy
