Foto: Ashyq derekkóz
Depýtattyń málimdeýinshe, Shý ózeni Qyrǵyzstannan bastaý alyp, Syrdarııaǵa quıýy tıis, alaıda sońǵy jyldary sý Sozaq dalasyna jetpeı, jol boıynda qalyp qoıǵan. Bul jaǵdaı aımaqtaǵy 80 myń turǵynnyń turmysyn qıyndatyp, ekologııalyq apat qaýpin kúsheıtip otyr.
«Turǵyndardyń aıtýynsha, tas pen topyraqtan bóget salyp, ózenniń aǵysyn toqtatyp tastaǵan moıynqumdyq bıznesmenge sot joq. 12 myń iri qarasy bar deıdi. Dronmen túsirilgen foto-vıdeolaryna deıin qolyma ustatty. О́zen birneshe jerden zańsyz bógelgen», dedi Maqsat Tolyqbaı.
Maqsat Tolyqbaı maýsym aıynda Jambyl oblysyna barǵan saparynda bul aqparattyń ras-ótirigin Premer-mınıstrdiń ózi suraǵannyn atap ótti.
«Alaıda, jergilikti sheneýnikter men salalyq mınıstirlik bul «jalǵan aqparat» dep Bektenovti keri qaıtarǵan. Sý resýrstary mınıstri bul fazendany nege qorǵashtap álek? Jaǵdaıdy bilmeı me, álde kásipkerge sózi ótpeı me? Nemese 12 myń sıyr asyraıtyn sharýashylyq mınıstr Nurjan Nurjigitovtiń ózine tıesili me?», dedi depýtat.
Depýtattyń aıtýynsha, Sozaq aýdanyndaǵy 8 aýyldyń turǵyndary Astanaǵa kelip, óz máselelerin tikeleı bılikke jetkizýge daıyn otyr.
«Rasynda ańqasy kepken aımaqtyń tuzy shyǵyp, ózendi jaǵalaı mekendegen 80 myń halyq ekologııalyq apattyń aldynda tur. Sozaqtyqtardyń onsyzda ýran óndirisinen kórip jatqan ekologııalyq zardaby az emes edi. Endi mine, sýdyń joqtyǵynan jeri qyzyl qumǵa, dalasy aıtaqyrǵa aınalyp, malmen kúneltken halyq shabyndyq shóptiń ózin Qyzylordadan satyp alýǵa májbúrmiz deıdi. Áıtpese, bir kezderi Syrdarııaǵa deıin jetetin Shý ózeniniń eki jaǵy qamys, aınalasy shabyndyq bolǵan. Qazir ár jerde bir bólinip qalǵan, sasyp jatqan sý baldyrynan basqa eshteńe tappaısyń», dep ashyndy depýtat.
Maqsat Tolyqbaı Sý resýrstary mınıstrinen tez arada sý rettegish quraldary men zańsyz salynǵan bógetterdi buzýǵa yqtal etýin talap etti.
«Sondaı-aq, gıdrotehnıkalyq qurylys-jaılardyń is júzindegi esebi júrgizilsin. Buǵan qosa ózenniń arnasyn buryp alyp, aınalasyn topyraq, taspen qorshaǵan fazenda jaıynda baıandalǵan vıdeo-fotoǵa mınıstrlik tarapynan túsinikteme berilsin. Monıtorıng pen baqylaýdy kúsheıtip, ózenge mehanıkalyq tazalaý jumystaryn júrgizýdi suraımyn», dedi M.Tolyqbaı.
