Joǵary tehnologııalyq jobalar men startaptardy damytýǵa arnalǵan «Farabi Hub» jańa ǵımaratynda ótken forým alańynda birlesken ınnovasııalyq jobalarǵa múddeli bıznes, ǵylym jáne memlekettik organdardyń ókilderi bas qosty.
Qala basshylyǵyn QazUÝ basqarma tóraǵasy – rektor Janseıit Túımebaev «Farabi Hub» ınnovasııalyq ónimder men joǵary tehnologııalyq jobalar ortalyǵyn aralap, qashyqtyqtan zondtaý, robototehnıka, sýperkompıýterlik tehnologııa, bıotehnologııa jáne nanotehnologııalar alańyndaǵy zamanaýı ázirlemelermen tanystyrdy.
Plenarlyq sessııada Erbolat Dosaev ǵylym men ınnovasııany ilgeriletý Memleket basshysy saıasatynyń basty basymdyǵynyń biri, dep atap ótti.
«Prezıdentimizdiń ıdeıalaryn júzege asyrýda Almatyǵa erekshe mán berilgen. Qala – elimizdiń ǵylymı jáne bilim berý ortalyǵy. Munda Qazaqstandaǵy joǵary oqý oryndarynyń úshten biri ornalasqan, 280 myńnan astam stýdent bilim alýda, 130-dan astam ǵylymı-zertteý ortalyǵy jumys isteıdi. Bul elimizdegi barlyq ǵylymı uıymdardyń úshten biri. Sońǵy úsh jylda ǴZTKJ shyǵyndary eki eseden astam ósip, 2022 jylǵy 47 mıllıard teńgeden byltyrǵy jyldyń qorytyndysy boıynsha 95 mıllıard teńgege jetti. Byltyr megapolıste Ǵylym jáne tehnologııalar keńesi quryldy. Bul keńes ǵalymdar, bıznes jáne memleket arasyndaǵy dıalog alańy. Basty maqsaty – tehnologııalardy naqty sektorǵa engizý máselesin sheshý» dedi qala basshysy.
Atap ótkendeı, ońtústik astananyń damý baǵdarlamasy ǵylym jetistikteri men tehnologııa transfertin belsendi paıdalanýǵa negizdelgen. Osy oraıda zertteýlerdi qarjylandyrýǵa jáne tehnologııalardy qala ómirine engizýge qajetti quraldar men múmkindikter bar. Eger jetkilikti joba usynylsa, bıyl qala damýynyń jeti negizgi baǵytyna sáıkes túrli jobalarǵa 10 mıllıard teńgege deıin qarajat bólinbek.
Almaty qalasy Sıfrlandyrý basqarmasynyń málimetinshe, byltyr megapolıs elimizdiń IT-sektorynyń kóshbasshysy bolyp tanyldy. Saladaǵy qyzmetterdiń 52 paıyzy Almatyǵa tıesili. Byltyr IT-naryqtyń jalpy kólemi shamamen 3 trln teńge bolsa, onyń 1,6 trln teńgesin Almaty naryǵy quraǵan.
О́z kezeginde, QazUÝ rektory Janseıit Túımebaev atap ótkendeı, QazUÝ Almatynyń ınnovasııalyq ekojúıesine kirigýge jáne ǵylymı ázirlemelerdi kommersııalandyrýǵa zor múmkindikterge ıe. Sondyqtan elimizdegi joǵary oqý oryndary arasynda eń iri tehnopark, ınnovasııalyq park jáne jasandy ıntellekt ortalyǵyn salý josparlanyp otyr.
