Sýretterdi túsirgen – Gúlnár MAHAN
Keshtiń tizginin ustaǵan aqyn Tilegen Ádilovtiń júreginen shyqqan ár sózdiń áseri tolqytyp otyrdy. Keshti atalǵan oqý ordasynyń «Shabyt» teatry men «Balaýsa» jastar shyǵarmashylyǵy ortalyǵynyń stýdentteri aqynnyń óleńin oqýmen bastady.
Bir kezderi Sáttibaı aıtys alamanynda jarqyraǵan jas talant edi. Onyń 2005 jyly shymkenttik aqyn Marjan Esjanovamen aıtysy ekran arqyly elge kórsetildi. Sáttibaı aqynnyń týǵan aýyly «Eskene» óleńine Qazaqstannyń eńbek sińirgen qaıratkeri Dáýrenbek Árkenov án jazypty. Jańa týyndyny sahnada ánshi Shyńǵys Muqaev oryndady. Osylaısha, ánniń de tusaýy kesildi. Erterekte aqynnyń «Qaraǵandy» atty óleńine Soldathan Ysqaq án jazǵan edi. Sol ándi respýblıkalyq Qarýly kúshter ortalyq ansambliniń solısi, ónerdegi baýyry Nurlybek Záken naqyshyna keltirip shyrqady.
Sáttibaı aqyn segiz qyrly, bir syrly edi. Onyń jazǵan betashar jyry elge keń taraldy. Toı tórinde áli oryndalyp júr. Aqyn termelerdi birneshe nusqada jatqa aıtyp, jyrlaı biletin. Sonaý bir jyldary «Tekti sózdiń tóresi – terme» atty respýblıkalyq jyrshy-termeshiler baıqaýyna qatysty. Aıtýly óner dodasynda «Kıeli meken – Ulytaý» degen óziniń týyndysymen úzdikter qatarynan kóringeni ónersúıer qaýymnyń áli esinde. Aqynnyń termesin aıtysker aqyn Dıdar Qamı oryndap berdi.
«Barlyq aqyn – balasy bir ananyń!». Serik Saǵyntaı men Rýslan Nurbaı baýyrlaryn ańsap jazǵan óleńderin oqydy.
Sal Sáttibaı ómiriniń sońǵy sátterinde óziniń bala kezden kórgen-túıgen, úlkenderden estigenderin oı-tolǵam etip, jınaqtap, estııar shaǵynda qatysqan alaman báıge týraly qyzyqtaryn «Shabandozdyń áńgimeleri» sıklimen birneshe shyǵarma jazypty. Aqyn bul jazǵandaryn jary Aınashqa qana oqyp úlgergen eken. Sol qundy dúnıeleri «Pyraq» kitabyna endi. «Quryshtan quıǵan qudiret» atty oı-tolǵamyn aqyn dosy Sultan Dáýlethanuly oqydy.
Sultan Dáýlethanulynyń bastamasymen ári redaktorlyǵymen Sáttibaı aqynnyń sońynda qalǵan jazbalary baspaǵa ázirlenip, birneshe jyldar birge qyzmet jasaǵan janashyr aǵasy Mıras Quttybaı, basqa da dostarynyń qoldaýymen «Pyraq» atty kitap shyqty. Aqynnyń sońynda qalǵan murasyn, qoljazbalaryn jınap, aýdıo-beıne materıaldaryn kompıýterge terip, qattaǵan aqynnyń jary Aınashtyń da eńbegi eren. Keshte Sáttibaı aqynnyń «Pyraǵynyń» tusaýy kesildi.
«Qoljazbalaryńdy jınasańshy, bir kitap shyǵaratyn keziń bolǵan joq pa?» degem. «Muqaǵalı aıtpaqshy, mendeılerdiń myńy kep, myńy ketken joq pa?!» dep qarap tur. Kóp oqyp, kóńiline kóp nárseni toqyǵany baıqalyp turýshy edi. Sondaı adam ǵana aıta alady mundaı sózdi. Sáttibaı Abaı ustanymyn ustanǵan saýsaqpen sanarlyqtaı talant edi», dedi Abaı atyndaǵy Memlekettik syılyqtyń ıegeri Serik Aqsuńqaruly saltanatty rásim kezinde.
Belgili ǵalym Qoılybaı Asanov ta ańqyldaǵan baýyryn saǵynyp: «Onyń jany tańǵy shyqtaı móldir edi... О́z ornyn, óz dárejesin jaqsy biletin. «Aǵa» degen sózinen aıaýly meıirim esip turatyn. «Sizge eliktep óstik», – deýshi edi. Adamgershilik, izgilik, qarapaıymdylyq sııaqty qasıetteri Sáttibaıdy oılaǵan armanynan da asqaq bıikterge shyǵardy», – dedi.
Dástúrli ánniń dúldúlderi Erjan Bazarbek pen Syrym Hordın án shyrqady. Mıras Quttybaı aqynnyń ákesi Temirǵalıdyń ıyǵyna shapan jaýyp, uly Sáken Júnisovke máshhúr sýretshi Káripbek Kúıikovtiń «Pyraq» óleńine salǵan kartınasyn syılady.
Kesh sońynda kópshiliktiń kózine jas irkildi. Sáttibaıdyń gıtaramen án salǵan beınetaspasy qosyldy. Sol ánin uly Sáken jalǵastyryp, shyrqady. Jınalǵan kópshilik ákesiniń úzilgen ánin, óshpes ónerin jalǵaıtyn muragerine tik turyp qoshemet kórsetti, aqynnyń rýhyna taǵzym qyldy.
Qaraǵandy oblysy
