Foto: Ashyq derekkóz
Jambyl oblysynyń «Qazsýshar» fılıaly men Shý-Talas basseındik ınspeksııasynyń basshylary Sozaq aýdanyna baryp, Shý ózeniniń arnasyn óz betinshe burý nemese zańsyz bóget salý faktileri anyqtalmaǵanyna kóz jetkizdi. Mınıstrlik barlyq sý paıdalanýshylar men sýarmaly alqaptar belgilengen lımıt aıasynda sýmen qamtylyp jatqanyn málimdedi.
«Atap aıtqanda, 2024 jyldyń qyrkúıek aıynan bastap Tasótkel sý qoımasynan Shý ózeniniń tómengi arnasyna 1 mlrd 356 mln m3 sý jiberildi. Jyl sońyna deıin taǵy 44 mln m3 sý jiberý josparlanyp otyr. 2025 jylǵy 27 naýryzda Shý ózeniniń sýy Sozaq aýdanynyń Jýantóbe aýyldyq okrýgine jetti. Qazirgi tańda sý aýdan shekarasynan 80 shaqyrym ishke qaraı taralyp jatyr. Beınejazbada kórsetilgen bóget, Moıynqum aýyldyq okrýginiń tusynda 1970 jyldary salynǵan jáne ony sý shaıyp ketpes úshin jergilikti ákimdik jyl saıyn nyǵaıtý jumystaryn júrgizedi. Radaı ózegi boıyndaǵy bóget Shý ózeniniń sýyn Sozaq aýdanyna jiberý jáne 10 myńǵa jýyq turǵyny bar Komsomol jáne Moıynqum eldi mekenderiniń turǵyndary men sharýa qojalyqtaryn sý shaıyp ketý qaýipinen saqtaý maqsatynda boı kótergen», delingen habarlamada.
Mınıstrlik Shý ózeniniń aǵysyn retteý jáne bógettiń buzylýynyń aldyn alý úshin Radaı ózeginiń basyna sý rettegish qurylǵy ornatý týraly sheshim qabyldanǵanyn habarlady.
«Bul qurylǵy sýdyń tabıǵı aǵysyn kezeń-kezeńimen, qaýipsiz jáne tıimdi basqarýǵa, sýdy Shý ózeniniń negizgi arnasymen jiberý jáne Sozaq aýdanyna sýdy jetkizý ýaqytyn azaıtýǵa baǵyttalǵan. Qazirgi ýaqytta, jergilikti ákimdik jobalyq-smetalyq qujattamasyn ázirlep jatyr», delingen habarlamada.
Aıta keteıik, aýdan ákimdiginiń málimeti boıynsha Shý ózeniniń boıyndaǵy Moıynqum aýdany aýmaǵynda 68 shaǵyn sharýa qojalyǵy jáne jalpy sany 7500 iri qara maly bar eki iri JShS bar.
Sý resýrstary jáne ırrıgasııa mınıstrligi ózenniń boıynda ornalasqan aýdandarǵa turaqty túrde sý jetkizýdi basty mindetterdiń biri dep sanaıdy. Osyǵan oraı, aldaǵy jylda sýmen qamtamasyz etý úshin Tasótkel sý qoımasyna 470 mln m³ sý jınaý josparlanǵan.
Mınıstrliktiń málimetinshe, ózen boıynda 500 sý sorǵy bar, zańsyz qoıylǵan 17 sý sorǵysy anyqtalyp, olarǵa aıyppul salynǵan.
Buǵan deıin Májilis depýtaty Maqsat Tolyqbaı QR Sý resýrstary jáne ırrıgasııa mınıstri Nurjan Nurjigitovke Shý ózeniniń zańsyz burylýyna qatysty másele kótergenin habarlaǵan edik.
