Fotolar: Tótenshe jaǵdaılar mınıstrliginiń baspasóz qyzmeti
Taýdaǵy kómek
Almatyda TJM qyzmetkerleri, «109» qyzmetiniń qutqarýshylary jáne taýdan túsý kezinde aýyr jaraqat alǵan adamǵa jedel kómek kórsetken qala turǵyndary Tótenshe jaǵdaılar mınıstriniń buıryǵymen gramotamen marapattaldy.
Oqıǵa 1 aqpanda bolǵan. Kýágerler Rýslan Shestakov, Ánýarbek Beısenov, Asyljan Dosjanov – zardap shekken adamdy birinshi bolyp baıqap, oǵan alǵashqy járdem kórsetken. Kóp uzamaı Apattar medısınasy ortalyǵynyń dárigerleri Aıbek Saǵymjanov pen Gúlnısa Anaıatova jáne «109» qyzmetiniń qutqarýshylary Parhat Iýnýsov pen Jomart Saýdanbekov kelgen.
«Ulym aýyr jaraqat aldy, onyń omyrtqasy syndy. Men kómekke kelgen batyl adamdardyń arqasynda onyń tiri qalǵanyna senimdimin. Rýslan Shestakov, Asyljan Dosjanov, Ánýarbek Beısenov ulymnyń dárigerlerdi kútýi úshin qoldan kelgenniń bárin jasady. Qıyn jaǵdaılarǵa qaramastan, ony jedel túrde aýrýhanaǵa jetkizgen qutqarýshylar men medısınalyq topqa erekshe alǵys aıtamyz. Ár mınýt mańyzdy boldy», dedi er adamnyń anasy Shynar Iztileýova.
Bir otbasyn eki stýdent qutqardy
Sala mınıstri general-maıor Shyńǵys Árinovtyń buıryǵymen Abaı atyndaǵy Qazaq ulttyq pedagogıkalyq ýnıversıtetiniń stýdentteri 20 jasar Ernar Tursyn jáne 22 jasar Nurasyl Álimtaev «О́rtte kórsetken qaısarlyǵy úshin» medaldarymen marapattaldy.
Esterińizge salaıyq, 2 naýryzda túnde Almaty qalasy, Jetisý aýdanynda jeke menshik turǵyn úıdiń janyp jatqanyn baıqaǵan ári kómek suraǵan aıqaılardy estigen atalǵan 2 stýdent oqıǵa týraly 112-shi qyzmetke jedel habarlaǵan. Qatty tútin men joǵary táýekelge qaramastan, janyp jatqan úıge júgirgen 2 stýdenttiń sheshýshi áreketteriniń arqasynda 64 jastaǵy áıel, 17 jastaǵy jáne 6 jasar qyz qutqarylǵan edi.
Taraz turǵyny janyp jatqan kólikten adamdardy qutqarǵan
Mınıstrdiń «О́rtte kórsetken qaısarlyǵy úshin» medalimen Zaýyrbek Manapbaı marapattaldy.
Esterińizge salaıyq, 8 qazanda Taraz qalasynda tehnıkalyq qyzmet kórsetý stansııasy janynda birneshe avtokóliktiń qatysýymen jol kólik oqıǵasy bolǵan, kólikterdiń biri órtenip, kelesi kólikte júrgizýshi men jolaýshy qalyp qoıdy. STO qyzmetkeri Zaýyrbek Manapbaı esh oılanbastan óz ómirin qaterge tigip, janyp jatqan kólikke kirip, adamdardy qaýipsiz jerge evakýasııalaý arqyly qutqarǵan. Ol sonymen qosa, zardap shekkenderge shuǵyl qyzmetter kelgenge deıin qajetti kómek kórsetken.
