TÚRKSOI Bas hatshysy Sultan Raevpen ótken áńgime barysynda Aqtaýdyń Túrki áleminiń mádenı astanasy retinde tańdalýynyń sımvoldyq mánine erekshe nazar aýdaryldy. Sultan Raev mınıstrdi osy mańyzdy oqıǵamen quttyqtap, bul mártebeniń mańyzy tek Qazaqstan úshin ǵana emes, búkil túrki elderi úshin asa joǵary ekenine toqtaldy. Taraptar túrki álemi elderi arasyndaǵy mádenıet pen rýhanı mura salasyndaǵy dıalogty tereńdetýdiń mańyzdylyǵyn atap ótti.
Túrki akademııasynyń prezıdenti Shahın Madjıdoǵly Mýstafaevpen kezdesý barysynda ǵylymı jáne tarıhı-mádenı yntymaqtastyq máseleleri talqylandy. Atap aıtqanda, túrki órkenıeti úshin erekshe mańyzǵa ıe ejelgi Saraıshyq qalashyǵynyń aýmaǵynda arheologııalyq jáne etnografııalyq sımpozıým uıymdastyrý máselesi qarastyryldy.
Vengrııa úkimetiniń komıssary Peter Hoppalmen ótken kezdesýde Qazaqstan men Vengrııa arasyndaǵy mádenı jáne gýmanıtarlyq yntymaqtastyqty damytý máseleleri sóz boldy. Atap aıtqanda, mádenı is-sharalarǵa (festıvalder, konsertter, kórmeler jáne bilim berý baǵdarlamalary) shyǵarmashylyq ujymdardyń qatysýy máselesi talqylandy. Sonymen qatar, eki el mýzeıleri arasynda ekspozısııalarmen almasý jáne birlesken ǵylymı jobalardy júzege asyrý arqyly yntymaqtastyq ornatý jaıy da nazardan tys qalǵan joq.
Qyrǵyz Respýblıkasynyń Mádenıet, aqparat jáne jastar saıasaty mınıstri Mırbek Mambetalıevpen ótken kezdesý barysynda taraptar ekijaqty mádenı jáne aqparattyq yntymaqtastyqty jandandyrýǵa degen nıetin rastady. Atap aıtqanda, qyrǵyzstandyq ártister men mádenıet qaıratkerleriniń halyqaralyq festıvalderge, teatr qoıylymdary men ózge de mádenı is-sharalarǵa qatysý jospary naqty talqylandy.
Kezdesýler senim men ózara túsinistik rýhynda ótip, túrki áleminiń baı murasyn birlesip nasıhattaý, mádenı baılanystardy nyǵaıtý men halyqaralyq seriktestikti damytý jolyndaǵy ortaq umtylystyń aıqyn kórinisine aınaldy.
