«Mansap» ortalyǵynyń dırektory Ernur Abdalıevtiń aıtýynsha, qazirde oblys ortalyǵynda is júrgizýshi, ekonomıst, esepshi, IT mamandary, zaýyttarda operator mamandary tapshy. «Jyl sońyna deıin qalada ýaqytsha jumys oryndarymen 956 adamdy, turaqty jumyspen 980 adamdy qamtý josparlanyp otyr. Budan bólek, bıyl «Jastar praktıkasy», «Alǵashqy jumys orny», «Kúmis jas», «Qoǵamdyq jumys orny», «Áleýmettik jumys oryndary», «Urpaqtar kelisimsharty» jobalary da jalǵasyn tabady. Búginde 457 adam jumyssyz retinde tirkelgen», dedi ortalyq dırektory.
Is-shara barysynda kópsalaly kolledjdiń muǵalimderi joǵary synyp oqýshylaryna tehnıkalyq mamandyqtar jóninde aqparat berip, sheberlik saǵattaryn ótkizdi. Qazir kolledjde tamaqtandyrýdy uıymdastyrý, dánekerleý isi, tokarlyq is, avtomobıl kóligine tehnıkalyq qyzmet kórsetý, tigin óndirisi jáne kıimderdi úlgileý, taǵam óndirisiniń tehnologııasy, esepteý tehnıkasy jáne aqparattyq jeliler syndy 7 mamandyq oqytylady. Bilim alýshylardyń sany – 462. Byltyrǵy túlekterdiń 76%-y jumysqa ornalasqan.
Is-sharanyń ashylýyna qala ákimi Ashat Berdihanov qatysyp, Jumysshy mamandyqtary jylynyń mańyzdylyǵyna toqtaldy. HR mamandary jastarǵa aqyl-keńesterin aıtyp, tájirıbelerimen bólisti. Sondaı-aq «Otbasy bank» AQ ókilderi «Naýryz jumysker» turǵyn úı baǵdarlamasy týraly aqparat berdi.
Almaty oblysy
