Fotolar Oblys ákimdigi
Taraz qalasynda B.Momyshuly atyndaǵy «Jeńis» saıabaǵynda «Jasyl el» eńbek jasaqtary maýsymynyń ashylý saltanaty ótti. Jastar saıabaqty qoqystardan tazartty. Sonymen qatar, ekoaksııalar Taraz qalasy Jibek Joly aýdany №13 shaǵyn aýdanynda, «Qarahan» kesenesi aýmaǵynda, Sarysý aýdany Jańatas qalasynyń ortalyq saıabaǵynda jáne Moıynqum aýdanynda ótkizildi.
Oblysta «Jasyl el» baǵdarlamasy sheńberinde eńbek jasaqtary stýdentterdi maýsymdyq jumyspen qamtýmen qatar, memlekettik jastar saıasatyn júzege asyrýǵa atsalysyp jatyr.
«Qatysýshylar aınalany kógaldandyrýǵa, sporttyq keshender men ózen jaǵalaýlaryn qalpyna keltirýge, saıabaqtar men qurylys alańdaryn tazartýǵa úles qosyp jatyr», dedi oblystyq jastar resýrstyq ortalyǵynyń dırektory A.Qadralıev.
Jambyl oblysy ákimdiginiń baspasóz qyzmetiniń málimdeýinshe, oblys boıynsha «Taza qala», «Taza kásip – taza aımaq», «Jasyl qala», «Bolashaqty birge otyrǵyzamyz» «Jer saǵaty» jáne t.b. aksııalar uıymdastyrylyp, aksııalar aıasynda 818 shaqyrym kanaldar men aryq júıeleri, 125 myń turǵyn úı aýlalary men 4,5 myń shaqyrym kósheler tazalanyp, 12 myń tonna qoqys shyǵarylǵan. Bıyl egiletin 195 myń taldyń búginge 70 myńǵa jýyǵy otyrǵyzylyp, 2,4 myń aǵash butalanǵan. 60 tarıhı-mádenı eskertkish, 143 saıabaq pen skver aýmaqtary turaqty qoqystardan tazalanyp jatyr. Atalǵan jumystarǵa 910 birlik tehnıka jumyldyrylǵan.
