UBT-da shekti baldy 75,5%-ǵa jýyq talapker jınady. Ortasha balǵa keletin bolsaq, ol 69 baldy (5 pánnen) qurady. Eń joǵary ball – 140, ony Almaty oblysynyń talapkeri jınady.
Testke qatysýshylardyń basym bóligi «Bıologııa-Hımııa» kombınasııalaryn tańdaǵan, atap aıtqanda, 17,3%-y tapsyrdy. «Matematıka-Fızıka» pánderin 17,1% tańdaǵan. Sondaı-aq, top-3 qataryna talapkerlerdiń 10,5% tańdaǵan «Matematıka-Informatıka» kombınasııasy kirdi. Eń az tańdalǵan kombınasııa – «Hımııa-Fızıka», ony 171 adam tapsyrǵan.
2025 jylǵy naýryz UBT-synyń qorytyndysy boıynsha mektep túlekteri «Oqý saýattylyǵy» pánin joǵary deńgeıde tapsyrdy. Ortasha eseppen, suraqtardyń 77,9%-yna durys jaýap berilgen.
Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda naýryz UBT-syna 386 talapker qatysqanyn aıta ketken jón.
UBT ótkizý barysynda 235 ereje buzýshylyq anyqtalǵan. Ǵylym jáne joǵary bilim mınıstrliginiń málimdeýinshe, 85 talapker smartfon jáne shpargalka sııaqty tyıym salynǵan zattardy alyp ótý áreketi saldarynan test tapsyrý múmkindiginen aıyryldy, testileý kezinde erejelerdi buzǵany úshin aýdıtorııadan 95 adam shyǵaryldy, al 55 adamnyń sertıfıkaty testileý beınejazbasyn tekserý nátıjesinde joıylǵan.
