Byltyr qalanyń týrzım salasyna tartylǵan ınvestısııa kólemi artyp, 110,9 mlrd teńgeni qurap, salystyrmaly kezeńge qaraǵanda 2,1 paıyzǵa artqan. Byltyrǵy jyl qorytyndysyna sáıkes týrızmnen salyq túsimderi 1,9 esege ósip, 90,7 mlrd teńgege jetip otyr.
Jeke ınvestorlar tarapynan qonaqúı, hostelderdi qosqanda 35 jańa nysan iske qosylǵan bolsa, 100 shaqyrym taý soqpaǵy abattandyryldy. 450 ınfraqurylym nysany ornatylyp, aqparattyq stendter, belgiler, oryndyqtar men kópirler, sondaı-aq kún panelderimen jabdyqtalǵan 13 kempıng aımaǵy ashyldy.
«Kóktóbe» saıabaǵynda «Densaýlyq joly» jańa jaıaý júrginshiler baǵyty ashylyp, onda ashyq aspan astynda serýendep, belsendi demalýǵa arnalǵan marshrýt abattandyrylǵan. Uzyndyǵy 1,2 shaqyrym joldyń qurylysy jeke ınvestısııalar esebinen jasaldy. Baǵyt boıyna zamanaýı jaryqtandyrý, beınebaqylaý júıesi, demalysqa jaıly jaǵdaıd jasaldy.
Týrıster men qala turǵyndary jıi keletin «Medeý» bógeti – bıik taýdaǵy ataýly sport kesheninen joǵary ornalasqan biregeı gıdrotehnıkalyq nysan. Abattandyrý aıasynda «Medeý» muz aıdynyn, tabıǵat kórinisterin baqylaý úshin arnaıy alań jasalyp, bınoklder qoıylǵan. Qaýipsizdikti saqtaý maqsatynda arnaı qurylǵylar men beınekameralar ornatylǵan.
Jańa jaıaý júrginshiler úshin «Jumbaq jolmen» týrıster Gorelnık vızıt-ortalyǵyna bara alady. Onyń uzyndyǵy 285 metrdi quraıdy. Bul jolmen kúnine 2 myńnan astam júrginshi ótedi. Infraqurylymy tolyqtaı abattandyrylyp, demalýǵa jaıly jaǵdaı jasalǵan. Joba ekotýrızmdi damyta otyryp, «Medeý» men «Shymbulaq» baǵyttarynyń júktemesin azaıtýǵa baǵyttalǵan.
Bıyl qalalyq Týrızm basqarmasy uzyndyǵy 100 shaqyrymnan asatyn 10 jańa taý soqpaǵyn abattandyrýdy jáne kún panelderimen jabdyqtalǵan 3 kempıng aımaǵyn jasaýdy josparlap otyr. Munymen qosa eki birdeı iri mádenı nysannyń — «Selınnyı» zamanaýı mádenıet ortalyǵy men Almaty Museum of Arts kórkemóner murajaıy ashylady.
Byltyr ońtústik shaharǵa 2 340 314 týrıst kelgen. Bul elimizdegi týrızm kórsetkishiniń 25,6, al sheteldik týrıster arasynda — 53 paıyzyn quraıdy.
Qala qonaqtary men turǵyndary úshin jasalyp jatqan zamanaýı jaǵdaılar elimizdegi týrızminiń ári álem saıahatshylary úshin de tartymdy ortalyq ekenin kórsetedi. Qazirgi kezde qala basshylyǵy týrısterge shańǵy kýrorttary men ekstrım-týrlardan bastap, gastronomııalyq festıvalder men tarıhı ekskýrsııalarǵa deıin jan-jaqty baǵdarlama usynyp otyr. Halyqaralyq áýe qatynastarynyń damýy da Almatyny Ortalyq Azııadaǵy eń tartymdy týrıstik baǵyttardyń birine aınaldyrmaq.
ALMATY
