«UBC Group» basshylyǵy 2023 jyly óndiristik alańdaryn Qazaqstanda ornalastyrý týraly sheshim qabyldap, jańa zaýyt salý úshin birqatar óńir arasynan Túrkistan oblysyn tańdaǵan. Jobaǵa sáıkes, bir shańyraq astynda óndiristik sehtar, qoımalar, ákimshilik jáne keńse ǵımarattary ornalasatyn zamanaýı kásiporyn boı kóteredi. Jobaǵa salynatyn ınvestısııa kólemi 30 mln eýroǵa deıin jetpek. «UBC Group» prezıdenti Igor Gýmennyıdyń aıtýynsha, kompanııa – tońazytqysh jabdyqtaryn óndirý salasynda jumys isteıtin jáne damyp kele jatqan Ýkraınanyń eń iri ónerkásiptik holdıngteriniń biri. Tutynýshylary – álemniń túkpir-túkpirindegi tanymal brendter men iri korporasııalar.
«Qoldaý kórsetken oblys ákimdigine alǵys aıtamyz. Tońazytqyshtar óndirisi jobasynyń sátti júzege asatynyna senimdimin. «UBC Group» sýsyndar men azyq-túlikke arnalǵan tońazytqysh jabdyqtaryn óndirý, jarnamalyq materıaldardy ázirleý jáne óndirý, jabdyqtar men tehnıkalyq úderisterdi jobalaý jáne montajdaý, tońazytqysh jabdyqtaryn jańartý jáne qyzmet kórsetý, taýar men qyzmetti satý sııaqty birneshe baǵyt negizinde jumys isteıdi», dedi Igor Gýmennyı.
Túrkistan oblysynyń ákimi Nuralhan Kósherovtiń sózinshe, bastama tikeleı Memleket basshysynyń qoldaýymen júzege asyp jatyr.
«Mundaı zamanaýı óndiris ornyn ashý – oblys úshin mańyzdy ekonomıkalyq qadam ǵana emes, sonymen qatar óńirdiń ınnovasııa jáne zamanaýı tehnologııaǵa daıyn ekeniniń kórsetkishi. Kásiporyn jańa jumys oryndaryn qurýǵa, óńirge qosymsha ınvestısııa tartýǵa múmkindik bermek. Bastama – sheteldermen yntymaqtastyqtyń jarqyn kórinisi. Biz jańa jobalarǵa, jańa ınvestorlarǵa qoldaý kórsetýge daıynbyz», dedi Nuralhan Oralbaıuly.
О́ndiris ornynyń ashylý rásiminen keıin qonaqtarǵa zaýyt aýmaǵyna ekskýrsııa uıymdastyryldy. Sondaı-aq Túrkistanda 100-den asa otandyq jáne shet memlekettiń bıznes ókilderiniń qatysýymen bıznes-forým ótti. Halyqaralyq forýmǵa qatysýshylar qatarynda Ýkraına, Túrkııa, Grýzııa, Qytaı, Ázerbaıjan, О́zbekstan jáne elimizdiń iri kompanııa ıeleri men ókilderi bar. Aımaqtyń ınvestısııalyq-ekonomıkalyq áleýeti keńinen tanystyrylǵan forýmda oblys ákimi jıynǵa qatysýshylardy birlese jumys isteýge shaqyrdy.
«Batys pen Shyǵys arasyndaǵy saýda qatynastary, tıimdi geografııalyq ornalasýy jáne kóptegen tarıhı nysany Túrkistandy Ortalyq Azııadaǵy ınvestısııa men týrızmniń ortalyǵyna aınaldyrýǵa zor múmkindik beredi. Qazir óńirdiń ınvestısııalyq qorjynynda 2025–2028 jyldarǵa josparlanǵan 110 ınvestısııalyq joba bar. Bul jobalar 4,6 mlrd dollarǵa deıin ınvestısııa tartýǵa, 19 myńnan astam jańa jumys ornyn qurýǵa jol ashady. Sondaı-aq óńirde «Turan» arnaıy ekonomıkalyq aımaǵy jáne ınvestısııalyq alańdar bar», dedi oblys ákimi.
«Túrkistan ınvest» kompanııasynyń basqarma tóraǵasy О́mirzaq Iýsýpov óńirdiń ınvestısııalyq áleýetin tanystyryp, usynylatyn múmkindikter týraly baıandady. Forýmǵa qatysýshylar pikir almasyp, shet memleketterden kelgen ınvestorlar birlese jumys isteýge nıet bildirdi.
Oblysta 210 myńnan astam shaǵyn jáne orta bıznes ókili, onyń ishinde 160-tan astam kompanııa sheteldik ınvestorlardyń qatysýymen jumys isteıdi. 80 myńnan astamy – sharýashylyq jáne fermerlik qojalyq. Keıingi 6 jylda Úkimet pen oblys ákiminiń qoldaýy nátıjesinde shamamen
9 mlrd dollar kóleminde ınvestısııa tartyldy. Onyń ishinde 63%-y – jeke ınvestısııa. Investısııa ónerkásip, jyljymaıtyn múlik, aýyl sharýashylyǵy, týrızm jáne jańartylatyn energııa kózderi sııaqty salalarǵa baǵyttaldy.
Túrkistan oblysy
