Sýretterdi túsirgen – Gúlnar MAHAN
Bul bastama akademık Evneı Bóketovtiń 100 jyldyq mereıtoıyna «100 ıgi is» jobasy aıasynda júzege asyrylyp otyr. Sonymen zamanaýı kitaphananyń saltanatty ashylý rásimin Edige Muhtaruly, professorlar Beısembaı Erǵalıuly, Jandos Qojahmetuly jasap, quttyqtaý lebizin bildirdi.
Edige Muhtaruly ýnıversıtettiń jańa kitaphanasyna klassık jazýshy Muhtar Maǵaýınniń 26 tomdyq tolyq jınaǵyn, «Qasym» kitap úıi shyǵarǵan birneshe kitapty syıǵa tartty.
– Kitaphana zaman talabyna saı qurylypty. Tánti boldyq. Aldaǵy ýaqytta jastardyń ilim-bilimin shyńdaýǵa qyzmet ete bersin. Baıqaǵanym, Qaraǵandyǵa elimizdiń basqa da oblystarynan jastar kelip bilim alady eken. Bóketov ýnıversıteti – elimizdegi jetekshi oqý oryndarynyń biri. Ákemniń bul ýnıversıtetke, Evneı Arystanulyna qurmeti bólek edi. Eger ákemniń jas kezinde táýlik boıy jumys isteıtin osyndaı kitaphana bolsa, onda qona jatar edi, – dedi Edige Muhtaruly.
Kúni-túni oqyrmanyna ashyq kitaphanadan stýdentter men oqytýshylar izdenisti údetip, ǵylymǵa den qoıýǵa múmkindik alady.
– Negizgi maqsat – jas býynǵa tereń bilim berý. «Asa mártebeli stýdent» degendi jıi aıtamyz. Barlyq ıgilik stýdentter úshin jasala beredi de. Máselen, Japonııa, Amerıka syndy damyǵan elderde kitaphananyń 24 saǵat jumys isteıtinin kórdim. Al bizde 18:00-de jabylyp qalady. Keıingi kezde «jastarǵa durys jaǵdaı jasamaı júrmiz be?» degen oı mazalaı berdi. Nege múmkindik týdyrmasqa? Mine, buǵan da jettik. Bul kitaphana táýlik boıy jumys isteıdi. Aldaǵy ýaqytta barlyq fakýltettiń kitaphanalaryn jańǵyrtý josparda bar, – dedi ýnıversıtet rektory Nurlan Dýlatbekov.
Rektor Nurlan Orynbasaruly Edige Muhtarulyna ýnıversıtet atynan estelik syılyq tabystap, razylyǵyn bildirdi. Sonymen qosa kitaphanaǵa jazýshy Kemel Toqaevtyń eńbekterin tartý etti. Fakýltet ujymy Edige Maǵaýınge «Tereńge tartqan tamyryn» atty bıografııalyq kitap syılady.
Jańa kitaphananyń sıfrlyq júıege negizdelýi bilim alýshylardyń ýaqytyn únemdep, izdenisin jeńildetýge zor múmkindik beredi. ID kartalar arqyly qajetti kitapty óz betinshe taýyp, qoldaný – ýaqyt talabyna saı jasalǵan tıimdi sheshim.
– Kitaphana bir mezette 100 adamǵa deıin qabyldap, sapaly qyzmet kórsete alady. Qorynda 200 myńnan astam kitap bar. Negizgi zalǵa Evneı Arystanuly men oqý ordasynyń ósip-órkendeýine úles qosqan ǵalymdardyń portretterin ildik. Joba buǵan deıin ýnıversıtettiń 13 fakýltetiniń úsheýinde júzege asyrylǵan. Bul – tórtinshisi. Árqaısysy bir-birine uqsamaıtyn stılde. Fılologııa jáne fılosofııa fakýltetinde ornalasqandyqtan, etno-stıl tańdaldy. Kelesi kitaphana shet tilderi fakýltetinde jabdyqtalmaq, – deıdi ýnıversıtettiń ǵylymı kitaphana dırektory Gaýhar Qýanyshqyzy.
Kitaphana segiz bólikten turady. Konferensııa zaly, jeke jumys, sırek qor, mýltımedııalyq resýrstar, etnoaımaq, abonement, kitap qory jáne oqý zaly. Ásirese Wi-Fi jelisimen qamtylyp, sıfrlyq júıeniń engizilýi bilim alýshylarǵa taptyrmas kómek. Ǵylymmen aınalysatyn jandarǵa arnalǵan sırek kitaptar qorynda eki myńǵa jýyq kitap bar.
Belgili kásipker, atymtaı azamat Erlan Áshim «Qasym» kitap úıi basyp shyǵarǵan kitaptardy jańa kitaphana qoryna syılady.
Sondaı-aq ýnıversıtette «Alash» kovorkıng-ortalyǵy ashyldy. Jańa ortalyqta yńǵaıly jumys aımaǵy, tegin Wi-Fi jáne dámdi kofehana qarastyrylǵan. Munda stýdentter oqý kezdesýin ótkizedi. Jobalarmen jumys isteıdi ári úzilis kezinde demalý úshin taptyrmas oryn.
Qaraǵandy oblysy
