Belgili qonaevtanýshy Oraz Qaýǵabaıdyń «Aqylmannyń balalyq jáne jastyq shaǵy» atty kitabynda Máskeýde oqyp júrgen Dinmuhammed Qonaev demalys alyp, poıyzben elge qaıtyp kele jatqanyn jazady. Kórshi vagonda qarýly kúzetpen kele jatqan saıası tutqyndar ornalasqan edi.
Dımash Ahmetuly eki vagonnyń túıisken tusynan syrtqa qarap turǵanda, tutqyndardyń biri onyń qaltasyna áldebir qaǵazdy súńgitip úlgeredi. Qonaev álgi azamattyń tegin adam emesin bilip, vagonyna kelip, konvertti ashyp qarasa, Álimhan Ermekovtiń áıeline jazǵan haty eken. Hatta etappen aıdalyp bara jatqan túrmeniń meken-jaıy jazylypty.
Álekeń beıtanys hat tasýshyǵa arnap, Almatydaǵy meken-jaıyn da tolyq kórsetken. Sonymen qatar «Osy hatty jetkiz, baýyrym!» deı kelip, óziniń Álimhan Ermekov ekenin jazypty. Dımash Ahmetuly matematıka oqýlyǵynyń avtory Álimhan Ermekovtiń ómirbaıany men eńbegin jaqsy biletin. Sondyqtan da, amanatqa qııanat jasamaı, hatty Alash arysynyń jarynyń qolyna tıgizedi.
Arada zymyrap talaı jyl ótedi. Alash arysy Álimhan Ermekov aqtalyp, Almatyǵa keledi. Ol kezde Dinmuhammed Qonaev Mınıstrler keńesiniń tóraǵasy bolatyn. Álimhan Ermekov jumys jáne baspana máselesimen tóraǵanyń qabyldaýyna jazylady.
Dımekeń alashordashylardyń sońǵy tuıaǵyn qushaq jaıa qarsy alyp: «Sizdiń Almatyda emes, Qaraǵandyda turǵanyńyz durys. Munda dushpandaryńyz kóp. Olar jumys istetpeı, shetqaqpaı bolasyz», dep keńesin beredi. Sondaı-aq baıaǵyda poıyzdaǵy hatty da esine salyp, jeńgeıge amanatty tapsyryp, alǵysyn alǵanyn da aıtady.
Álekeń ornynan atyp turyp: «Qudaı Taǵala maǵan qaıyrymdy jigitti tekke keziktirmegen eken», dep inisin qushaqtaı alady. Onyń aqylyna qulaq asyp, «Qaıdasyń, Qaraǵandy?» dep týǵan jerine attanyp kete barady.
Lenınniń aldynda aıqasqa túsip, qazaq shekarasyn shegendeý isinde erlik kórsetken Álimhan Ermekov pen Qazaqstandy uzaq jyldar boıy basqarǵan Dinmuhammed Qonaevtyń tosynnan jolyǵýy kezdeısoqtyq pa? Saıası saýatty Dımekeńniń «saıası tutqyn» sanalatyn Ermekovtiń qupııa hatyn jaryna jetkizýi batyldyq emes pe? Bul suraqtarǵa oqyrmandar ózi jaýap tabar dep oılaımyz.
