Buǵan deıin qazaq mektebiniń oqýshylary tozyǵy shyqqan balabaqsha ǵımaratynda oqyp kelgen. Ol másele osydan tórt jyl buryn “Egemen Qazaqstan“ gazetinde kóterilip, jańa mektep qurylysynyń jumystary dereý qolǵa alynǵan.
Kentte búginde 4207 adam turady, týrızm men ınjenerlik ınfraqurylym damyp keledi. Búgin munda jalpy aýdany 10775 sharshy metr memlekettik tilde bilim beretin 200 oqýshyǵa arnalǵan №1 Jańa Buqtyrma orta mektebi ashyldy.
- Memleket basshysy bilim deńgeıi búkil el boıynsha teń bolýy tıis ekenin Aıtqan. Al bul jańa, zamanaýı mektep – urpaqty tárbıeleý men sapaly bilim berý jolyndaǵy úlken qadam. Osy bilim oshaǵynda elimizdiń bolashaǵyn qalyptastyratyn sanaly, bilimdi de bilikti azamattar túlep ushatynyna senimdimiz, – dedi Nurymbet Saqtaǵanov.
Oblys ákiminiń aıtýynsha, oqý jaǵdaıyn jaqsartý jáne oqý oryndarynyń tapshylyǵyn azaıtý maqsatynda ótken jyly oblysta 10 jańa mektep salynǵan. Olardyń jeteýi paıdalanýǵa berildi, ekeýi Tarbaǵataı aýdanynda offshorlyq kelisim-sharttar boıynsha salyndy. Bıyl taǵy 13 mektep salý josparlanyp otyr.
Búgingi tańda Jańa Buqtyrmada 114 oqýshy bilim alyp jatyr. Mektepke deıingi mekemelerde 129 bala bolsa, olardyń 33-i bıyl 1-synypqa barady.
Basa aıta keterligi, mektep ustazdary men oqýshylary «Egemen Qazaqstan» gazetine rızashylyqtaryn bildirdi.
Shyǵys Qazaqstan oblysy,
Altaı aýdany
