– Siz Otanǵa adal qyzmet etýdiń jarqyn úlgisisiz. Siz laıyqty ómir súrip, kópti kórgen adamsyz. Soǵys jáne soǵystan keıingi kezeńniń qatal synaqtaryna abyroımen tótep bergen batyrsyz. Bostandyq pen beıbit aspan úshin, Jeńis úshin sizderdiń aldaryńyzda bas ıemin. Sizderge zor densaýlyq jáne súıispenshilik, qamqorlyq úshin baqytty kúnder tileımiz, – dep quttyqtady oblys ákimi men qala basshylyǵynyń atynan Qazybek bı aýdany ákiminiń orynbasary Rınat Qarjasbaev.
Marııa Efımovna 1925 jyly 13 sáýirde Qaraǵandy oblysy Rostovka aýylynda dúnıege kelgen. 1944 jyly 19 jasynda áskerge shaqyryldy. Máskeý Bas áskerı mektebiniń áıelder mergendik mektebinde oqyǵan, sodan keıin 1945 jyldyń tamyzyna deıin 3-shi Belorýs jáne Ýkraına maıdandarynda mergen bolǵan. Jeńisti Pragada qarsy alǵan.
II dárejeli Otan soǵysy ordenimen, «Erligi úshin», «Germanııany jeńgeni úshin» eki medalimen, Keńes Odaǵynyń Marshaly G. K. Jýkovtyń medalimen, «Ýkraınany azat etkeni úshin» jáne jaýyngerlik eńbegi úshin alǵys hattarmen marapattalǵan.
– 9 mamyr – eń ataýly kún. Men ony áli kúnge deıin tolqyp, kózime qýanyshtyń jasy tola eske alamyn. Biz jeńisti kúttik jáne onyń keletinine sendik. Al jastarǵa men bir keńes bergim keledi. Árqashan qozǵalysta bolý, jumys isteý jáne jalqaýlanbaý qajet. Úlkenderdi qurmettep, óz qurdastaryńa úlgi bolyńdar, – deıdi ardager.
Ardagerdi týǵan kúninde Qorǵanys mınıstrliginiń ókilderi de quttyqtady. Qaraǵandy oblysy Qorǵanys isteri jónindegi departamenti bastyǵynyń orynbasary polkovnık Erkebulan Mustaǵulov Marııa Shınkevıchke mınıstrdiń atynan quttyqtaý hatyn tapsyrdy. Sondaı-aq, ardagerge qonaqqa «Jas Sarbaz» mektebiniń oqýshylary men Nurken Ábdirov atyndaǵy mekteptiń tárbıelenýshileri de bardy.
– О́mir barlyǵyna beriledi, biraq ony osylaı abyroımen súrý árkimniń taǵdyryna jazbaǵan. Erlikterińiz úshin rahmet! Siz soǵysta ǵana emes, soǵystan keıin de eńbek etip, eldi qalpyna keltirdińiz. Sizder sııaqty jandardyń arqasynda biz beıbit elde ómir súrip jatyrmyz, bul bizdiń batyrlarymyzdyń eń jaqsy esteligi, – dedi qalalyq máslıhattyń tóraǵasy Altyntóre Bókenov.
Qaraǵandy oblysy
