Atalǵan derek boıynsha qylmystyq is qozǵaldy.
«Polıseıler zardap shekken sheteldik azamatty tez arada aýrýhanaǵa jetkizdi. Oǵan medısınalyq kómek kórsetildi. Jábirlenýshi aýrýhanaǵa jatýdan bas tartty, onyń ómirine qaýip tónip turǵan joq. Kúdikti oqıǵa ornynan qashyp ketpek bolǵan, alaıda ol tez arada ustalyp ýaqytsha ustaý ızolıatoryna qamaldy. Tergeý barysy meniń jeke baqylaýymda», dedi mınıstr.
Jelide oqıǵanyń vıdeosy paıda boldy. Kadrda motosıkl júrgizýshisiniń janarmaı quıý beketine qaraı kele jatqanyn, onyń artynan er adamnyń ileskenin kórýge bolady. Bir kezde er adam qaltasynan pyshaqqa uqsas zatty shyǵaryp, motosıklshige birneshe ret suǵyp alady.
Vıdeodan olardyń arasynda buryn da janjal bolǵany baıqalǵan. Alaıda jábirlenýshiniń mundaı shabýyldy kútpegeni anyq. Artynsha qaskúnem aq tústi kólikke otyryp, oqıǵa ornynan ketip qalǵan.
Jambyl oblystyq densaýlyq saqtaý basqarmasynyń málimetinshe, pyshaq jaraqatymen 32 jastaǵy er adam aýrýhanaǵa jetkizilgen.
«Ol 13 sáýirde saǵat 16:10-da Merki aýdandyq ortalyq aýrýhanasynyń jedel járdem bólimine jetkizildi. Dıagnoz - keýde aımaǵynyń oń jaǵy jáne bel aımaǵyndaǵy pyshaq jaraqaty. Alǵashqy medısınalyq kómek kórsetildi, tigis salyndy», dep habarlady Jambyl oblystyq densaýlyq saqtaý basqarmasynyń baspasóz qyzmeti.
Jábirlenýshi keıinnen ambýlatorlyq emdeýge jiberildi.
