О́ndiris jandanyp keledi
Jańa kásiporyndar ashylyp, logıstıkalyq habtar iske qosylǵan. Bul júzdegen jańa jumys ornyna sep. О́ndirisin («Býratıno» saýda markasy) Almatydan aýdanǵa kóshirýdiń qamyn jasap jatqan «Caspian Beverage Holding» bastamasy da maqtaýǵa turarlyq.
«Bizge mańyzdysy – ınvestısııa tartý arqyly aýdan ekonomıkasyn damytý. Jańa kásiporyndar men óndirister qarjy quıyp qana qoımaı, halyqqa jańa jumys ornyn beredi. Sondyqtan ınvestorlar úshin qolaıly jaǵdaı jasaımyz. Byltyr ónerkásip óndirisi 621,8 mlrd teńgege jetip, 9,4 paıyzǵa ósti, onyń ishinde óńdeý ónerkásibiniń úlesi 91,7 paıyzdy qurap, 576,1 mlrd teńgege jetti. Aýyl sharýashylyǵynda 74,6 mlrd teńgeniń ónimi óndirilip, naqty kólem ındeksi 100,2 paıyzdy qurasa, 224,2 mlrd teńge ınvestısııa tartylyp, 40,4 paıyzǵa ósti», deıdi aýdan ákiminiń orynbasary Ádis Seıdaqmatov.
Qazir aýdanda 18 iri óndiristik oryn, onyń ishinde 7-eýi júıe quraýshy kásiporyn jumys atqaryp jatyr. Olar – «RG BRANDS Kazakhstan», «Coca-Cola Almaty Bottlers», «Hamle Company LTD», «Asia Agro Food», «Efes Kazakhstan», «Kagazy Recycling», «Kelýn Kazfarm» sııaqty flagmandar. О́tken jyly Shamalǵan aýylynda «Qazaqstandyq qubyr armatýrasy zaýytynyń» (KZTA) qurylysy aıaqtalyp, turaqty 80 jumys orny quryldy. Saýynshy aýylynda «BMG Holdinq» kompanııasynyń sendevıch-panel shyǵaratyn zaýyt qurylysy aıaqtalyp, 60-qa jýyq jańa jumys orny ashyldy.
Bıyl qańtarda negizgi kapıtalǵa tartylǵan ınvestısııa kólemi 13,3 mlrd teńgeni qurap, ótken jylmen salystyrǵanda 3 ese ósken (2024 jyly qańtarda – 4,4 mlrd teńge).
Aýdanda tıimdi logıstıkalyq keshender de boı kóterip jatyr. «Focus Logistics» kesheniniń birinshi kezeńi aıaqtalyp, «Ozon» qoımasy iske qosyldy. Bul jerde myńǵa tarta adam jumysqa ornalasty. Osy aıda «Samsung» qoımasy ashylyp, taǵy 100 jańa jumys orny paıda bolady. «Imagine Apple City» jobasy aıasynda 500 jumys orny qurylmaq. Jalpy alǵanda, aýdan boıynsha 4 500 jańa jumys orny ashylady dep josparlanǵan.
Logıstıkalyq qoımalar qurylysy bastalady
«Focus Logistics» jer ýchaskeleri Almaty aglomerasııasynyń soltústik-batys bóliginde, Almaty qalasynan 19 shaqyrym jerde ornalasqan. Úlken Almaty aınalma avtomobıl joly (ÚAAAJ) men «Aqseńgir» temirjol stansasyna jaqyn ornalasqandyqtan júkterdi barlyq baǵytta jyldam jetkizýge múmkindik bar. Kompanııanyń jer ýchaskelerin ıgerý 3 kezeńge bólingen. Áýeli 95 gektar alańda konteınerlik termınaly bar «A+» klasty logıstıkalyq park salý kózdelip otyr.
«Byltyr qazannan bastap jalpy aýdany 40 000 sharshy metrden asatyn «Ozon» fýlfılment ortalyǵynyń birinshi kezeginde operasııalyq qyzmet júrgizilip jatyr (jospar boıynsha – jalpy qýaty 112 000 sharshy metr bolatyn 3 kezeń). Osy jyldyń birinshi jartyjyldyǵynda paıdalanýǵa beriletin BTS jáne BTR formaty boıynsha 200 000 sharshy metrden astam A klasty ámbebap qoımalardy salý josparlanýda. Úshinshi kezeńde qýattylyǵy 100 000 TEU deıingi zamanaýı konteınerlik termınal qurylysyn aıaqtaý kózdelgen», deıdi «Focus Logistics» JShS Bas dırektory Dıas Ǵalıev.
Osy kúni iske qosylǵan «Ozon» qoımasynda Qarasaı aýdanynyń eldi mekenderinen keletin myńǵa jýyq adam jumys isteıdi. Olar halyq tutynatyn turmystyq taýarlardy tapsyrysqa qaraı býyp-túıý jumystarymen aınalysady. Alyp qoımanyń taǵy bir artyqshylyǵy – otandyq ónim óndirýshilerdiń de taýarynyń satylýyna septigin tıgizetini. Ekijaqty kelisimshart jasasyp, taǵam túrlerinen ózge eksportqa shyǵatyn ónimder osy qoıma arqyly alys-jaqyn sheteldegi «Ozon» qoımalaryna jetkizilip, odan ári tutynýshylarǵa jóneltiledi. Bul óz kezeginde otandyq ónim túrleriniń ótimdiligin arttyrýǵa yqpal etpek.
«Altyn taǵanyń» aýqymy keń
Aýdandaǵy iri óndiris oshaǵynyń biri bolady dep boljanyp otyrǵan «Altyn taǵa» temir-beton buıymdaryn óndirý zaýytynyń qurylysy da qarqyndy jalǵasyp jatyr. Tolyq qýatqa jetkende 700 adam eńbekke aralaspaq.
«Zaýyt 2023 jyldyń sońynda iske qosylyp, 1-sehta elektr jelilerin tartýǵa arnalǵan baǵandardy shyǵarýdy bastadyq. 2-sehta 35 kılovattyq jelilerdi tartýǵa arnalǵan úlken tirekter shyǵarylady. Olar tolyqtaı sement buıymdary. German tehnologııasymen jabdyqtalǵan 3-sehta 100 túrli tústegi sement tósenishter 20 shaqty qalypta shyǵarylady. Munda joǵary sapaly bordıýrler jáne splınterlik blok kirpishterdi óndiremiz. 4-sehta karer jumystarynyń temirden jasalatyn jabdyqtaryn jáne tirkemelerdi, kran-balkilerdi shyǵarý josparlanǵan. Sondaı-aq syrttan tapsyrys qabyldap, ony tolyqtaı osy metall óndiretin sehta shyǵaryp berý múmkindigi qarastyrylǵan. Qazir 5-sehty iske qosýǵa daıarlyq jumysy júrgizilýde. Jalpy aýmaǵy shamamen 13 000 sharshy metr bolady. Onda sendvıch-panelder shyǵarylady», deıdi «Altyn taǵa» JShS dırektory Nurbol Berikboluly.
Onyń aıtýynsha, 250 vagon syıatyn jáne jylyna 4 myń tonna sement saqtaıtyn qoıma turǵyzylmaq. Bul shyǵarylǵan ónimdi sapaly saqtap, tıisti jerge irkilissiz jetkizýge múmkindik beredi.
Almaty oblysy
