«Damý» kásipkerlikti damytý Qory fılıalynyń dırektory Jandos Nurǵazınov, qoldaýǵa ıe bolǵan jobalardyń 85%-y mıkro jáne shaǵyn bıznes salalaryna tıesili ekenin atap ótti.
«Qor qoldaǵan kásiporyndar búkil kezeń ishinde 16 619,9 mlrd teńgege ónim óndirip, al tólengen salyq kólemi 1 242,5 mlrd teńgeni qurady. 140 myńnan astam jumys orny saqtalyp, jańadan ashyldy. Osylaısha, salynǵan árbir 1 teńge 5 teńge mólsherinde salyq retinde qaıtarylady. Sonymen birge Qor shaǵyn jáne orta kásipkerlik sýbektilerin qoldaýǵa baǵyttalǵan birqatar quraldardy usynady. Olardyń qatarynda basym baǵyttar boıynsha 200 mln teńgege deıingi nesıelerge paıyzdyq mólsherlemeni sýbsıdııalaý, kepildik berý, jeńildetilgen nesıeleý jáne jobalardyń tıimdiligin baqylaý bar. Qoldaý alý úshin kásipker bankke ótinim tapsyryp, maquldaýdan ótip, qajetti qujattardy «Damý» qoryna usynady. Keıin bankpen jáne qor ókilderimen úsh jaqty kelisimshartqa qol qoıylady», deıdi J.Nurǵazınov.
Jaýaptylardyń aıtýynsha, qala ákimdigimen birlesip iske asyrylatyn «Almaty Business/Jana Business» baǵdarlamasyna erekshe nazar aýdarylmaq. Baǵdarlama aıasynda ShOB ókilderine jyldyq 7% mólsherlememen, 7 jylǵa deıingi merzimge jáne 100 mln teńgege deıingi somaǵa nesıe berý usynylady. 2015 jyldan bastap baǵdarlamaǵa 32,5 mlrd teńge baǵyttalǵan bolsa, aǵymdaǵy jyly taǵy 3 mlrd teńge bólý josparlanyp jatyr.
Baǵdarlama aıasynda 852 kásipkerge qoldaý kórsetilip, jalpy somasy 124,9 mlrd teńgege nesıe berilgen. Sonyń nátıjesinde 1 214 mlrd teńgeniń ónimi óndirilip, bıýdjetke 100,7 mlrd teńge salyq túsken.
ALMATY
