Bilim • 19 Sáýir, 2025

«NASA»-daǵy bilimdiler belesi

0 ret

kórsetildi

2 mın

oqý úshin

Otandyq ozat oqýshylar álemge áıgili «NASA» (National Aeronautics and Space Administration – ǵarysh agenttigi) uıymy men AQSh Ulttyq ǵarysh qoǵamy (National Space Society) uıymdastyrǵan bilim báıgesinde top jardy. Daryndylar dodasyna dúnıejúziniń 25 elinen mektep jasyndaǵy 26 myńnan asa jetkinshek qatysqan. Al elimizdiń namysyn qorǵaǵan órender eki birdeı joǵary júldeni qanjyǵaǵa baılady.

Aıdana ShOTBAIQYZY

«Space Settlement Contest» – mektep oqýshylaryna arnalǵan jyl saıyn ótkiziletin halyqaralyq baıqaý. Bul bilim básekesi qatysýshylardyń ınjenerlik qabiletin, kreatıvti oılaýyn damytýǵa, ǵylymǵa umtylysyn arttyrýǵa baǵyttalǵan.

Oqý-aǵartý mınıstrliginiń deregine súıensek, órenderimizdiń «Space Settlement Contest 2025» halyqaralyq baıqaýynda usynǵan «YURT» jobasy jeńiske jetip otyr. Kamıla Ertisqyzy, Ilııas Dáýlet, Anastasııa Soı, Iýlııa Kımnen quralǵan top Iýpıterdiń orbıtasymen qozǵalyp, onyń Ganımed jáne Kallısto serikterine jaqyndaı alatyn avtonomdy ǵarysh stansasynyń jobasyn tanystyrdy. Stansa 30 myńǵa jýyq adam turýǵa arnalǵan, jasandy gravıtasııa júıesimen jáne tolyqtaı derbes tirshilikpen qamtamasyz etetin júıemen jabdyqtalǵan. Dál osy otandyq oqýshylardyń jumysy úzdik dep tanylyp, top birinshi oryndy oljalady.

Ekinshi oryndy elimizden barǵan taǵy bir top enshiledi. Olar baıqaýda 45 myń turǵynǵa arnalǵan Ganımedtiń tómengi orbıtasynda ornalasqan ǵarysh stansasyn qurastyrǵan. Bul jobany Asan Tabyldy, Arman Temirbolatov, Inkárbek Sabyrjan, Tomırıs Quzbakova, Muhıdın Japarov, Álisher Baǵdáýlet, Berik Ýálı, Aısulý Nursultan, Arlan Taırov, Aslan Baqyttan turatyn top ázirledi. Al olardyń jetekshisi – 12-synyp oqýshysy Ádilet Sandyqbaev.