Baıqaý 1997 jyldan bastap ótkizilip keledi. Is-sharanyń maqsaty – qazaq halqynyń rýhanı tutastyǵyn qalyptastyrǵan Qoja Ahmet Iаsaýıdiń artynda qalǵan rýhanı muralaryn nasıhattaý, óskeleń urpaqty uly baba murasyn meńgerip, zertteýge yntalandyrý, ortaǵasyrlyq Ámir Temir dáýirinen jetken qundy muralardy keńinen nasıhattaý.
Qatysýshylar «Iаsaýı murasy – balaǵa amanat», «Bilimdi myńdy jyǵar alysqanda», «Oı júırik» atty úsh kezeń boıynsha ózara saıysqa tústi. Oqýshylar hıkmetterdi jatqa oqyp, uǵymdardy túsindirdi, sondaı-aq Qoja Ahmet Iаsaýıdiń ómiri men shyǵarmashylyǵyna qatysty suraqtarǵa jaýap berdi.
Baıqaý nátıjesine sáıkes bas júldeni túrkistandyq Qoltaı Ferýza ıelendi. I oryn Jetisý oblysynan qatysqan Ádiljan Shynarǵa jáne aqmolalyq Jaqsylyq Daıanaǵa buıyrdy. Ekinshi oryndy alty qatysýshy ıelense, al 21 qatysýshy III oryn ıegeri atandy. 3 qatysýshy kórermen kózaıymy nomınasııasyn jeńip aldy. Barlyq qatysýshy men jetekshi arnaıy dıplommen marapattalyp, syılyqtar tabystaldy. Halyqaralyq qazaq-túrki ýnıversıtetiniń, «Dintaný jáne teologııa» mamandyǵy boıynsha oqý granty Álimova Aıgerimge jáne Ahmetov Sabyrjanǵa buıyrdy.
