Almaty qalasy ákimdiginiń baspasóz qyzmeti
Lokalızasııanyń birinshi kezeńinde ortaq ınvestısııa kólemi 4 mlrd teńgeni quraǵan. 2024 jyldyń jeltoqsan aıynda kompanııa oryndyqtarǵa arnalǵan kóbikti qalyp-pishinderdiń synama partııasyn shyǵaryp, sertıfıkasııadan ótip, ónimderdi «Hyundai» jeńil avtokólikter óndirisine jetkizý maqsatynda «Hyundai Motor Company» (Koreıa Respýblıkasy) kelisimin alǵan bolatyn.
Halyqaralyq standart talaptary men qyzmetkerlerdiń biliktilik deńgeıiniń sáıkestigi rastalǵan soń, kásiporyn oryndyqtardy óndirý boıynsha tehnologııalyq operasııalardy júzege asyrý maqsatynda memleketpen kelisimge otyrdy.
«Prezıdent el ekonomıkasyn damytýdaǵy jeke ınvestorlardyń mańyzdy róline toqtalyp, kásiporyndarǵa jumys oryndaryn saqtaý jáne óndiristi jańǵyrtý boıynsha kóńilge qonymdy mindettemeler júktelýge tıis ekenin atap ótti. Biz moınymyzǵa alǵan mindetterimiz aldyndaǵy jaýapkershilikti tolyqtaı sezinemiz. Osy maqsatta syrtqy faktorlarǵa táýeldilikti azaıtý, avtokólik ónerkásibinde bilikti ınjenerler býynyn daıyndaý, sonymen birge shaǵyn jáne orta bıznesti damytýǵa járdemdesý úshin avtokomponentter men shıkizat óńdeýdiń qomaqty úlesin lokalızasııalaýǵa qaraı baǵyt alyp kelemiz», deıdi «Astana Motors» bas dırektory Beknur Nesipbaev.
«Youngsan» tóraǵasy Pak Chon Bomnyń aıtýynsha, bul tek alǵashqy qadam ǵana.
«Biz «Astana Motors» pen «Youngsan» arasyndaǵy bekem baılanysqa negizdelgen bastamalardyń nátıjesin kórip otyrmyz. Álemde jáne TMD aımaǵyndaǵy avtokólik ónerkásibindegi qarqyndy ózgeristerdi eskere otyryp, osy baǵytta únemi jumys isteımiz», dedi.
«Almaty Autoparts Production» óndiris qýaty – jylyna 100 myń oryndyq jınaǵy. «Hyundai Trans Kazakhstan» zaýytynda usaq túıindi óndirisi arqyly «Hyundai Tucson» modeline arnalǵan oryndyqtar shyǵarylady. Jaqynda zaýyt «Hyundai Santa Fe» modeline arnalǵan oryndyqtar óndirisine de kirispek. Bolashaqta kásiporyn ónimderin jańa «Astana Motors Manufacturing Kazakhstan» mýltıbrendti zaýytyna, sondaı-aq basqa da avtokólik kásiporyndaryna jetkizýdi josparlap otyr.
«Almaty Autoparts Production» kásipornynyń mamandary kóbikti qalyp-pishinderdi óndirýdiń tehnologııalyq operasııalaryn meńgergen. 2026 jyly zaýyt jetkiziletin shıkizattan oryndyq qaptamasyn tigý boıynsha lokalızasııanyń ekinshi kezeńine shyǵady. Kásiporyn tigin sehyn ashyp, ony jabdyqtaýǵa jáne kadrlardy oqytýǵa qosymsha 720 mln teńge ınvestısııa jumsaýdy kózdep otyr.
