Foto: Ashyq derekkóz
Alǵash ret balanyń jynysyn bilýdiń erekshe tásili 2008 jyly AQSh-ta uıymdastyrylǵan. Los-Andjeles qalasynda turatyn Djenna Karvýnıdıs esimdi bloger torttyń ishin qyzǵylt túspen ásemdep, osylaısha jaqyndaryna qyz kútip otyrǵanyn jarııalaǵan.
Dál osy keshten keıin bul tásil áleýmettik jelilerde beleń alyp, qoǵamda vızýaldy shoýǵa aınaldy. Tipti, keıingi jyldary «Gender party-dyń» masshtaby úlkeıip, rekvızıtteri de kúrdelene túsken.
Alaıda, bir otbasynyń baqytty sátteriniń kýási bolǵan merekeniń aınalasynda birneshe rezonans týdyratyn oqıǵalar da paıda bolǵan. Máselen, 2017 jyly Arızona shtatynda balanyń jynysyn anyqtaý úshin ótkizilgen mereke kezinde qoldanylǵan pırotehnıkalyq qurylǵy orman órtine sebep bolǵan. Bul oqıǵa shamamen 190 sharshy shaqyrym ormandy jerdi kúlge aınaldyrǵan.
Dál osyndaı jaǵdaı 2019 jyly Kalıfornııanyń Eldorado okrýginde de qaıtalanǵan. Jynysty jarııalaý úshin qoldanylǵan arnaıy tútin shyǵaratyn qurylǵy 76 sharshy shaqyrym jerdi joıyp jibergen. Saldarynan júzdegen otbasy baspanasyz qalǵan.
Djenna Karvýnıdıs óziniń ıdeıasynan keıin bolǵan osyndaı qaıǵyly jaǵdaılardy kórip, renishin bildirgen.
«Men tek otbasylyq sátti bóliskim kelgen edi. Al qazir adamdar ómirine qaýip tóndirip jatyr. Tipti keıde jynysqa baılanysty alalaýshylyq kórinisterge aınalyp ketkenin kóremin» degen ol Elle jýrnalyna bergen suhbatynda.
