Foto: siapress.ru
«Aýyl» partııasynyń múshesi qazirgi tańda kıik jaılaǵan aımaqtardaǵy sharýalar tarapynan kóptegen shaǵym túsip jatqanyn jetkizdi. Osyǵan baılanysty ol bul túıtkildi sheshýdiń tıimdi jolyn tabý qajettigin atap ótti. Alaıda, onyń oıynsha, bul jol esh jaǵdaıda kıikti atý arqyly júzege aspaýy tıis.
«Jeke pikirim – kıik sanyn atý arqyly retteýge qarsymyn. О́tken jyly 235 myń kıikti atýǵa ruqsat berilgen kezde, bul másele boıynsha mınıstrmen tikeleı sóılestim. Qańtar aıynda 85 myń basty atý josparlanǵanyn, bul ruqsattyń 10 aqpanǵa deıin jaramdy ekenin aıtty. Osyǵan baılanysty men Premer-mınıstr Oljas Bektenovke resmı hat joldap, bul úrdisti toqtatýǵa atsalysqan edim. О́ıtkeni býaz kezinde, ishinde 2-3 laǵy bar kıikterdi atý obal bolady», deıdi depýtat.
Saýryqovtyń aıtýynsha, kıik sanyn retteýdiń balama tásili bar.
«Bul úshin arnaıy óńdeý sehtaryn ashyp, buqtyrylǵan et óndirisin uıymdastyrý qajet. Biraq mundaı jaǵdaıda kıikti atyp emes, arnaıy torlar arqyly ustaý nemese qamaýda ósirý ádisterin qoldanǵan jón. Shetelderde jolbarys, arystan sekildi jyrtqyshtardy atyp almaı-aq ustap jatqany sekildi, kıikterge de sondaı tásilderdi qoldanýǵa bolady dep sanaımyn», deıdi depýtat.
