Talqylaýǵa Májilis depýtattary, memlekettik mekemelerdiń ókilderi, ǵylymı uıymdar, úkimettik emes sektor, halyqaralyq sarapshylar jáne buqaralyq aqparat quraldarynyń qyzmetkerleri qatysty.
Dóńgelek ústel barysynda kıik sanynyń kóbeıýi jaǵdaıynda bıologııalyq ártúrlilikti saqtaý, aýyl sharýashylyǵy salasyndaǵy shyǵyndardy azaıtý jáne kıik popýlıasııasyn ǵylymı turǵydan dáleldengen ári qoǵam úshin qolaıly tásilmen retteý máseleleri sóz boldy.
Ekologııa jáne tabıǵı resýrstar mınıstrligi kıik popýlıasııasynyń qazirgi ahýaly, olardy qorǵaý sharalary, halyqaralyq áriptestik jáne baqylaý júıesi boıynsha óz baıandamasyn usyndy. Aýyl sharýashylyǵy mınıstrligi fermerlerge kórsetiletin memlekettik qoldaý túrleri – qorshaýlarǵa beriletin sýbsıdııalar, jabaıy janýarlardan kelgen shyǵyndardy óteý jáne epızootııalyq baqylaý jaıynda aqparat berdi.
Ǵalymdar qaýymdastyǵy kıikterdiń sanyn basqarýǵa arnalǵan ǵylymı ádistemelermen, sanaq júrgizý tehnologııalarymen, kóshi-qon prosesterin modeldeýmen jáne popýlıasııanyń ońtaıly kólemin anyqtaý joldarymen tanystyrdy. Sonymen qatar, halyqaralyq mindettemelerdi saqtaý, tabıǵı resýrstardy tıimdi ári utymdy paıdalaný joldary, sonyń ishinde jartylaı erkin ustaý tásilderi boıynsha usynystar aıtyldy.
Halyqaralyq tabıǵatty qorǵaý odaǵy (HTQO) ańshylyq resýrstardy utymdy jáne turaqty paıdalaný tabıǵatty saqtaý qaǵıdalarymen tek úılesip qana qoımaı, sol qaǵıdalardy júzege asyrýǵa da yqpal etetinin burynnan moıyndaǵan. Mundaı paıdalanýdyń áleýmettik-ekonomıkalyq tıimdiligi nysanaly janýarlar túrleri men olardyń tabıǵı mekendeý ortasyn saqtaýǵa serpin beredi (HTQO, Túrlerdiń ómir súrýi jónindegi komıssııa, 2012 j.).
Kıik sanynyń tarıhı shekten asyp ketýi jáne jergilikti turǵyndarmen qaqtyǵystardyń jıileýine baılanysty kıikterdi turaqty jáne rettelgen túrde paıdalaný qajettiligi týyndap otyr. Bul tásil – suranysqa ıe, ǵylymı jáne ekonomıkalyq negizdemege súıengen, ári halyqaralyq sarapshylar tarapynan qoldaý taýyp otyrǵan jol.
