Byltyr jazýshy Tóken Áljanteginiń «Qyzyqtyń bári aýylda» shyǵarmasy «Aıboz» ulttyq ádebı syılyǵynyń «Úzdik balalar ádebıeti» atalymynda jeńimpaz atanǵan edi. Minekı, jas óskinderdi taǵy bir kitabymen qýantyp otyr.
Jazýshy Súıindik Janysbaı, balalar kitaphanasynyń basshysy Baıan Qýanyshqyzy saltanatty túrde jańa kitaptyń tusaýyn kesip, jyly lebizderin bildirdi.
Súıindik Janysbaı kezdesý qonaǵynyń shoqtyǵy bıik shyǵarmalaryna toqtalyp, jańa kitaptyń jas oqyrman úshin taptyrmas tárbıe quralyna aınalatynyna senim bildirdi. Sóıtip, óziniń de jaqynda shyqqan «Altyn tostaq» atty ertegiler kitabyn tartý etti.
«Kitaphana qorynda balalarǵa arnalǵan sapaly, túrli tústi kitaptar kóbeıgen saıyn oqyrman sany da artady. Sebebi kitaphanaǵa alǵash kelgen bala qyzyldy-jasyldy, ádemi bezendirilgen kitapqa qol sozady. «Bazarlyq» kitaby balalardyń talǵamyna saı shyqqan. Kitaphana qorynyń osyndaı kitappen tolyqqanyna óte qýanyshtymyz», degen kitaphana basshysy Baıan Qýanyshqyzy ujym atynan Alǵyshat pen Abaıdyń bıýstin syılady.
Shákirtteri atynan sóz alǵan qalamgerdiń qaryndasy Saltanat Smaǵultegi jazýshyǵa qolsaǵat, qalamgerdiń jaryna qazaqtyń jón-joralǵysymen oramal syılady.
Keshke jazýshynyń týǵan jeri Jańaarqadan da meımandar kelipti. Qalamgerdiń el aýzynda júrgen «Jańaarqa valsi» ánin Meıramgúl Káripjanova shyrqady.
Jas oqyrmandar jazýshyǵa shyǵarmashylyǵy, jańa kitaby jóninde túrli suraq jaýdyrtty. Qalamger de súıikti oqyrmandaryn saǵynsa kerek, ár saýalǵa júıeli jaýap qaıyryp otyrdy. Osylaısha, jas oqyrmandarmen emen-jarqyn áńgime keshtiń sońyna jetkenin de sezdirmedi.
Qaraǵandy oblysy
