«Kitapqumarlyq – jaqsy qasıet. Kóptegen memleket Ulttyq kitap kúnin atap ótedi. Biz, eń aldymen, jastardy kitap oqýǵa baýlýymyz kerek. Sonda jappaı kitap oqıtyn ultqa aınalamyz», – degen Prezıdent tapsyrmasyn júzege asyrý aıasynda jergilikti kitaphanalar jańartýdan ótip, oqyrmandaryn qýantyp jatyr. Sonyń biri – Qonaev qalasyndaǵy ortalyq kitaphana.
Almaty oblysy ákimdiginiń qoldaýymen alty aı aralyǵynda jańǵyrtýdan ótken qalalyq kitaphana elimizde alǵash atalyp ótetin mereke qarsańynda esigin aıqara ashyp, oqyrmandaryna zor qýanysh syılady.
Zamanaýı standarttarǵa sáıkes jabdyqtalǵan kitaphana bir mezette 100 adamǵa qyzmet kórsetýge múmkindik beredi. Munda joǵary jyldamdyqty ınternet, kovorkıng aımaqtar, shyǵarmashylyq keńistikter men zamanaýı ádebıetter qory qarastyrylǵan.
Osylaısha, zamanaýı úlgidegi kitaphananyń materıaldyq-tehnıkalyq bazasy tolyqtaı jańartylǵanyn tanystyrǵan kitaphana dırektory Aıgúl Aqtanova, kitap qorynyń saqtaý erejelerin eskerip, aýa almastyrǵysh qurylǵylar ornatylyp, «Planskan» arnaýly kitap skaneri qoıylǵanyn, balalarǵa arnalǵan bilim men demalys aımaǵy qurylǵanyn atap aıtty.
Rýhanııat ordasynyń ashylý rásiminde oblys ákiminiń orynbasary Bolat Kúreńbekov bul jobanyń óńirdiń rýhanı-mádenı ómirindegi mańyzyn aıryqsha atady.
«Bul jaı ǵana jańartylǵan ǵımarat emes, bilimge, oqýǵa, damýǵa jeteleıtin zamanaýı mádenı ortany qalyptastyrýdyń úlken múmkindigi. Memleket basshysy Qasym-Jomart Toqaev kitaphana isiniń mańyzyn birneshe márte atap ótken bolatyn. Biz bul baǵytta júıeli jumystardy jalǵastyramyz», – dedi ol.
Almaty oblysynda osy kúni 144 kitaphana jumys isteıdi. Bıylǵy jyly óńirdiń Uıǵyr aýdanyndaǵy, Eńbekshiqazaq aýdanynyń Shelek aýylyndaǵy jáne Qarasaı aýdanynyń Jandosov aýylyndaǵy kitaphanalarǵa jańǵyrtý jumystaryn júrgizý josparlanǵan. Jyl saıyn jergilikti bıýdjet esebinen qalamgerlerge arnaıy stıpendııa taǵaıyndalyp, aqyn-jazýshylardyń jaryqqa shyqqan eńbekteri óńir kitaphanalaryna taratylyp keledi.
Kitaptyń qundylyǵyn tilge tıek etken saltanatty is-sharada jazýshy Sáýle Dosjan, Ulttyq kitaphana dırektory Ǵazıza Nurǵalıeva, aqyn Maqpal Mysa júrekjardy tilekterin jetkizdi.
О́ńirdiń barlyq aýdandarynyń kitaphanashylary kóshpeli kórme uıymdastyryp, taý tulǵaly qalamgerleriniń týyndylaryn tanystyrdy.
«Osy kitaphananyń turaqty oqyrmanymyz. Úıde ózimizdiń jeke kitap buryshymyz bar. Balalarym kitaphananyń atynan kóptegen baıqaýlarǵa qatysyp, túrli deńgeıdegi júldeli oryndarǵa ıe bolyp júr. Búgingi ashylyp jatqan kitaphanaǵa jer men kókteı ózgeris jasalyp, birqatar jańa kitaptar qosylypty. Osyndaı jaıly orynda kitap oqýǵa qumarlyq arta túseri sózsiz», – deıdi kópbalaly ana Aqtolqyn Maısalımova.
Kitaphananyń ashylý saltanaty tús aýa «Rýhanııattyń janashyry – kitap» atty merekelik keshke ulasty. Oblystyq ortalyq ámbebap kitaphana ujymy uıytqy bolǵan bul sharaǵa aqyn, jazýshylar men mádenıet salasynyń maıtalmandary, qoǵam belsendileri qatysty. Aıtysker aqyn Aıbek Bestenqul jyrdan shashý shashty. El aldynda sóz alǵan Jazýshylar odaǵynyń músheleri, aqyn Jaras Sársek, aqyn, dramatýrg Baqyt Bedelhan, Almaty oblystyq Jazýshylar odaǵy fılıalynyń tóraǵasy Erjan Toqtar, jazýshy Qanat Ábilqaıyr, jazýshy, dramatýrg, Qazaqstan Prezıdentiniń arnaýly ádebı syılyǵynyń laýreaty Álisher Aıtýar kitap oqý – adam oıyn damytyp, óresin ósiretinin, til baılyǵyn ushtap, ómirde óz ornyn tabýǵa yqpal eterin alǵa tartty.
Kitaptyń qoǵamdaǵy róli men rýhanı qundylyǵyn nasıhattap, jas urpaqtyń kitapqa degen súıispenshiligin arttyrýǵa baǵyttalǵan is-shara barysynda aqyn-jazýshylarmen kezdesý uıymdastyrylyp, qoltańba alyp, kitaptar talqylanyp, vıktorınalyq oıyndar oınalyp, konserttik baǵdarlamalar usynylyp, kópshiliktiń kóńilin shalqytty.
Almaty oblysy
