Sýretti túsirgen – Erlan OMAR, «EQ»
Prezıdent Qasym-Jomart Toqaev Ulttyq kitap kúnin engizgen III Ulttyq quryltaıdyń otyrysynda «Kitaphana – memlekettiń, ulttyń negizgi jady. Elimiz úshin qundy tarıhı derekter men materıaldardyń deni kitaphanada saqtalady. Sondyqtan kitaphana isin damytýǵa beıjaı qaraýǵa bolmaıdy. Kitap oqyrmanǵa qoljetimdi bolýy kerek», degen edi. Sodan beri Ulttyq kitap kúni bıyl tuńǵysh ret atalyp ótip jatyr. Jer-jerde ótip jatqan is-sharalar leginde esep joq. Kitap oqýdy nasıhattaıdy, kitap oqylady, talqylanady, adamdar izgilikke bir taban jaqyndaıdy. Burynǵydan góri el ishinde kitap oqýǵa betburys bar. Qazirgi kitaphanalar qandaı? Kirse shyqqysyz, jaryq ta, jaıly. Otyryp, turyp, tipti, jantaıyp jatyp oqımyn deseń de jaǵdaıdyń bári jasalǵan. Aldyńnan shyqqan kitaphanashy qyzmet kórsetip báıek bolady. Ádebıetterdi surasań, jón silteıdi, naqty tapsyrys berseń danalardyń, ǵalymdardyń, bilgishterdiń tájirıbesin tııanaqtaǵan jınaqtardy úıip-tógip usynady. Qaraısyń, oqısyń, tańdaısyń, talǵaısyń. Áıteýir ozbasań, qatardan qalmaısyń. Tek qana ózińniń tabandy erik-jigeriń jetsin. Qalǵan jaǵdaıdyń bári tur. Sizge kim kerek boldy eken? Abaı men Shákárim be, álde Tolstoı men Chehov pe? Múmkin Shpengler men Shopengaýerdiń eńbekteri shyǵar? Munda bári tabylady. Bolmaǵan kúnniń ózinde izine túsip, baǵyt alasyz. О́ıtkeni munda siz jalǵyz emessiz, tejelip qalmaısyz. Qasyńyzda kitaphanashy bar, álem ǵulamalarynan beli qaıysqan sóreler men qabyrǵalar, ınternet syndy ıgilikterdiń barlyǵy siz úshin tynymsyz qyzmetke kóshedi. Álem kitaphanalardyń arqasynda izgilik pen parasatty eske salyp turǵandaı seziledi.
