«Taza Qazaqstan» respýblıkalyq ekologııalyq aksııasynyń bir baǵyty «Jasyl aımaq» is-sharasynyń maqsaty – qorshaǵan orta men turǵyndar úshin qolaıly jaǵdaılardy qamtamasyz etý, azamattyq jaýapkershilikti arttyrý, ekologııalyq sana men ekologııalyq mádenıetti qalyptastyrý. Kegen orman sharýashylyǵy memlekettik mekemesi Memleket Basshysy Qasym-Jomart Toqaevtyń bastamasymen 2024 jyldan bastap osy aksııaǵa belsene qatysyp keledi.
«Búgin Kegen orman sharýashylyǵy memlekettik mekemesiniń Jalańash ormanshylyǵynda osy óńirge beıimdelgen ormanshylar, mektep oqýshylary, kolledj stýdentteri, aýyl turǵyndarynyń qatysýymen shrenk shyrshasy men boz arsha egildi. Tek otyrǵyzyp qana qoımaı, biz ary qaraı da kútip, baptaý jumystaryn júrgizemiz», deıdi Almaty oblysy Tabıǵı resýrstar jáne tabıǵatty paıdalanýdy retteý basqarmasynyń basshysy Qanat Núsipbaev.
«Kegen orman sharýashylyǵy» kommýnaldyq memlekettik mekemesiniń uıymdastyrýymen Jalańash orman sharýashylyǵynda Shrenk shyrshasynyń 10 myń kósheti, 1000 dana qaraǵaı, 200 dana boz arsha aǵashynyń kósheti egildi.
«Taza Qazaqstan» aksııasy bizdiń mekemeniń jumys baǵytymen úndes. Sondyqtan alǵashqy kúnnen bastap, halyq arasyndaǵy ekologııalyq mádenıettiń deńgeıin arttyrý, azamattardy qorshaǵan ortany qorǵaý máselelerine belsendi tartý baǵytyndaǵy jumystarǵa atsalysyp kelemiz. Buǵan deıin Jalańash aýylyndaǵy «Taza Qazaqstan» ekologııalyq aksııasy boıynsha S.Beısembetuly atyndaǵy mektep oqýshylarynyń qatysýymen tuqymdardy konteınerlerge otyrǵyzý arqyly kóshet ósirý sharasy ótkizilip, «Tabıǵatty aıalaý - bolashaqqa jasaǵan qamqorlyq» atty taqyryppen qustar uıasy ilindi. Kógaldandyrý plantasııasyna 10 000 Shrenk shyrshasynyń kósheti, 1000 qaraǵaı, 200 boz arsha otyrǵyzyldy. Aldaǵy ýaqytta «Bulaq kórseń kózin ash», «Tuqym jınaý», «Tuqymdy sebý, ósirý» aksııalary júzege aspaq. Sonymen qatar Jalańash aýylyndaǵy tuqymbaqta ósirilip jatqan ekpe kóshetterdi kútip baptaý aksııalaryn ótkizemiz degen josparymyz bar», deıdi «Kegen orman sharýashylyǵy» kommýnaldyq memlekettik mekemesiniń dırektory Aıbolat Soltanǵazıev.
Mekeme dırektorynyń aıtýynsha Jalańash aýylyndaǵy tuqymbaq aǵash tuqymdaryn daıyndaý, ósirý baǵytynda jumys isteıtin elimizdegi eń iri tuqymbaqtardyń biri. Munda ósirilgen aǵash kóshetteri búginde aýdan, oblys kólemindegi suranysty qamtamasyz etip otyr.
Memleket basshysy Qasym-Jomart Toqaevtyń 2020 jylǵy 1 kyrkúıektegi Joldaýynda aıtylǵan memlekettik orman qoryna 2 mıllıard aǵash otyrǵyzý tapsyrmasyn oryndaý maqsatynda mekemeniń bazalyq jáne ýaqytsha tuqymbaǵynan Baqanas, Narynqol, Kegen aýdandaryna otyrǵyzý úshin 325,5 myń Shrenk shyrshasynyń 4 jyldyq ekpe kóshetteri berilgen.
«Taza Qazaqstan» ekologııalyq aksııasy, jalpyhalyqtyq aǵash egý kúnine aýdan, oblys kólemine 1000 túp toń topyraǵymen ár túrli toptaǵy aǵashpen qamtamasyz etken. Bul aǵashtardyń basym bóligi búgin Kegen aýdanynda ótken «Búkilqazaqstandyq aǵash egý kúni» aksııasynda egildi.
Kegen orman sharýashylyǵy memlekettik mekemesi 2025 jyly ormandy molyqtyrý boıynsha taýly aımaqqa 20 gektar jerge 80,0 myń dana, 22 ga jerge tolyqtyrý jumystaryna 25,0 myń dana Shrenk shyrshasynyń kóshetin otyrǵyzýdy josparlap otyr. Kógaldandyrý plantasııasyna 3,0 ga jerge 30,0 myń dana Shrenk shyrshasynyń kóshetteri otyrǵyzylyp, 0,6 ga jerge tuqymy sebilmekshi. Qazirgi kezde 3,0 gektar jerde 2 mln 970 myń 600 ekpe kóshetteri kútip baptalýda.
