Sýretti túsirgen – Erlan OMAR, «EQ»
Jas býynǵa ekologııa taqyrybynda bilim berip, sanasyna izgiliktiń dánin sebýge búkil álem qulshynyp otyr. Qalalar kóbeıip, ınfraqurylym men óndiris damyǵan saıyn ekologııalyq máseleler qıyndap barady. Jahandyq jylyný, tabıǵı resýrstardyń sarqylýyna da beıjaı qaraýǵa bolmaıdy. Búgingi bóbekter eseıgende qaı salada eńbek etse de, tabıǵatty aıalaý keregin umytpaǵany jón. «Jasyl balabaqsha» jobasynyń negizgi maqsaty – osy. Búginge deıin eldegi 80 mektepke deıingi bilim mekemesi «Jasyl balabaqsha» jobasyna qosylypty. Joba aıasynda shamamen 20 myńnan asa baldyrǵan ósimdikterdi tárbıeshilermen birge kútip-baptaıdy. О́simdiktermen, janýarlar álemimen tanysady. Balabaqsha aýlasyna gúlderdiń, kókónister, jemis-jıdektiń nebir túrin otyrǵyzady. Sondaı-aq balalar qaldyqty suryptaýdy úırenedi. Sýdy, elektr energııasyn tıimdi paıdalaný týraly túsinik qalyptastyrady. Osylaısha, baldyrǵandar ekologııalyq mádenıettiń alǵashqy daǵdylaryn úırenedi. Kóringen jerge kúl-qoqys tastamaı, qorshaǵan ortany taza ustaýdyń qadir-qasıetin bala jastan bilip ósedi. Tanym kókjıegi keńeıedi.
Jobanyń taǵy bir artyqshylyǵy – balalar tek teorııalyq bilimmen shektelmeıdi. Tabıǵat aıasynda ekologııa taqyrybyna qatysty oıyn oınaıdy. Baqsha ósimdikterin egýdiń qyr-syryn meńgeredi. Ekken dánniń qyltıyp kóterilgenin, kógergenin, keıin piskenin bárin-bárin baqylaıdy. Bul tájirıbe balanyń eńbekke qyzyǵýshylyǵyn oıatyp, jaýapkershiligin arttyrýǵa septesedi. Osyndaı sátti mysaldyń birin Taraz qalasyndaǵy mektepke deıingi uıym kórsetip otyr. Balabaqshanyń shaǵyn jylyjaıynda balalar qulpynaı ósirgen. Oqý-aǵartý mınıstrligi Balalardy erte damytý ınstıtýtynyń dırektory Marııa Ermanovanyń aıtýynsha, jańa tásil balalardyń ekologııalyq mádenıetin erte qalyptastyrýǵa kómektesedi.
– Jobanyń bala bolashaǵyna paıdasy kól-kósir. Balalar tabıǵatty qorǵaýdyń mańyzyn uǵyp, qorshaǵan ortaǵa janashyr bolyp jetiledi. О́simdikterden bólek, qustarǵa, jándikterge qamqorlyq tanytýdy úırenedi, – deıdi M.Ermanova.
Balanyń ekologııalyq mádenıetin qalyptastyrýmen qatar damýyna kómektesetin jobany eldegi basqa da balabaqshalar qoldap, qatar tolyǵyp jatsa, nur ústine nur. О́ıtkeni mundaı balabaqshalardyń tájirıbesi álemde oń nátıje berip keledi.
