Shara barysynda stýdentter, eriktiler men jastar uıymdarynyń músheleri Uly Otan soǵysynyń ardagerleri, maıdangerler, jazýshylar men qoǵam qaıratkerleri jerlengen zırat mańyn tazalap, gúl shoqtaryn qoıdy.
Aksııanyń maqsaty — el qorǵaǵan erlerdiń rýhyna taǵzym etý, jastardyń tarıhı sanasyn qalyptastyrý jáne otansúıgishtikke tárbıeleý. Uıymdastyrýshylardyń aıtýynsha, mundaı bastamalar óskeleń urpaqtyń tarıhqa degen qurmetin arttyryp, erlik pen eldiktiń mańyzyn uǵyndyrýǵa baǵyttalǵan.
«Batyrlardyń erligin mundaı aksııa kezinde ǵana emes, únemi este ustaǵan jón. Qabirlerdiń tazalyǵy – olardyń murasyna degen rızashylyǵymyz ben qurmetimizdiń belgisi», - dedi Almatynyń bas ımamy Tólebı Ospan.
Memorıaldy ýchaskelerdi tazalaýǵa JOO stýdentteri, eriktiler qozǵalystarynyń músheleri, Almaty qalasyndaǵy dinı uıymdar men etnomádenı ortalyqtardyń ókilderi de ún qosty.
«Bul jaı senbilik emes. Soǵys ardagerleri men ata-babalarymyz halyqtyń jadynda máńgi qalady. Jastar sol erliktiń qandaı bıik rýh pen qaısarlyqty talap etkenin bilýi kerek. Bul bizdiń tarıhymyz», – deıdi Túrksib aýdandyq kommýnıtı ortalyǵynyń dırektory Qadyrbek Faızýllaev.
Aǵa býynnyń erligine qurmet kórsetken jastarǵa uıymdastyrýshylar alǵys bildirdi. Aıta ketsek, búgin Almatyda «Taza Qazaqstan» aksııasy aıasynda ótken senbilik tutas qala aýmaǵyn qamtydy.
