Orman sharýashylyǵy jáne janýarlar dúnıesi komıtetiniń buıryǵyna sáıkes 26 naýryzdan bastap Almaty jáne Almaty oblystarynyń memlekettik orman qory aýmaǵynda órt qaýpi bar kezeń resmı túrde belgilendi. Almaty qalasy Tótenshe jaǵdaılar departamenti ókilderiniń aıtýynsha, daıyndyq ótken jyldyń kúzinde bastalyp, josparly rejimde jalǵasýda.
«Almaty aýmaǵynda Ile-Alataý ulttyq parkiniń (20 805 ga), «Medeý» tabıǵı parkiniń (708,2 ga) jáne Baým toǵaıynyń (137,7 ga) ýchaskeleri ornalasqan. Bul aımaqtar tabıǵatty qorǵaý qyzmetteriniń erekshe nazaryn aýdarady. Departamenttiń, ákimdiktiń jáne basqa da jaýapty uıymdardyń bastamasymen aýmaqtardy qurǵaq ósimdikterden tazartý jumystary júrgizildi. Sondaı-aq halyqpen profılaktıkalyq jumys kúsheıtildi. Qazirde jol boıyndaǵy mıneraldanǵan jolaqtar, uzyndyǵy 39,1 km qalaǵa irgeles jatqan ashyq aýmaqtar jáne 35,2 ga aýmaqta qurǵaq ósimdikterdiń eńisi boıynsha jumys jasaldy», dedi Almaty qalasy TJD memlekettik órt baqylaý basqarmasynyń bastyǵy Konstantın Kanın.
Qazirgi ýaqytta qala aýmaǵynda qurǵaq ósimdikterdiń janýynyń 120 jaǵdaıy tirkelgen. Kóp oqıǵa ot pen turmystyq qoqysqa abaısyz qaraýdyń saldarynan oryn alyp otyr. Qalanyń orman-saıabaq jáne taý bókterindegi aımaqtaryn patrýldeý úshin jıyntyq jasaq quryldy. Kún saıyn 13 qyzmetker men 2 birlik tehnıka kezekshilik atqarady. Qajet bolǵan jaǵdaıda tıisti qural-qondyrǵylarmen jeke quramnyń 100-ge deıin adamy qosymsha tartylady. Jaǵdaıdy baqylaý úshin teplovızorlary men daýys zoraıtqyshtary bar ushqyshsyz ushý apparattary (drondar) da qoldanylady. Sondaı-aq Medeý saıabaǵynda órtti erte anyqtaıtyn optıkalyq-sensorlyq kameralary bar beınemonıtorıng júıesi jumys isteıdi.
О́rtten saqtaný – ortaq basymdyq. TJD qala turǵyndary men qonaqtaryna taýly-ormandy jerlerde órt qaýipsizdigi erejelerin saqtaýdyń mańyzdylyǵyn eske salady. Mamandar qala turǵyndarynan tabıǵı ortada muqııat bolýdy, qoqystardy qaldyrmaýdy, janyp turǵan sirińke, temeki tuqyldaryn tastamaýdy, arnaıy bólinbegen jerlerde ot qoımaýdy, qurǵaq shópti órtemeýdi suraıdy.
