«Tarıhy myńjyldyqtarmen astasyp jatqan Taraz jerinde jaryq kórgen jańa jýrnaldyń óz mıssııasy bar. Eń bastysy – babalar amanatyna adal bolý kerek. Ult tarıhy, ádebıet pen mádenıettiń, ǵylymnyń jarshysyna aınalatyn jýrnaldyń sapaly shyǵýyn redaksııa ujymy qaperden shyǵarmaıdy degen senim zor. «Tekturmas» - óńirdiń rýhanı keńistigin keńeıtip, talantymen tanylǵan qalamgerler men jas zertteýshilerdiń jańashyl qadamyna jol ashatyn minber», dedi óńir basshysynyń orynbasary Serik Sálemov jýrnaldyń tanystyrylymynda sóılegen sózinde.
Is-shara barysynda sóz alǵan belgili qalamger Pernebaı Dúısenbın Jambyl óńiriniń tylsymǵa toly tarıhy áli talaı jyldar boıy zerdelenetinin atap ótip, jańa jýrnal ujymy tarıh pen ádebıetti, mádenıet jáne ǵylym taqyrybyn tereńnen qaýzaýǵa den qoıǵany abzal ekenin tilge tıek etti.
«Sońǵy jyldary óńir rýhanııatyna aıryqsha kóńil bólinip jatyr. Oblys basshysynyń yqpalymen qalamgerlerge beriletin stıpendııa kólemi artty. Aqyn-jazýshylardyń jınaǵyn shyǵarý isi de myqtap qolǵa alyna bastady. Qalaı desek te, jambyldyq qalamgerler sońǵy ýaqytta bıliktiń jyly kózqarasyn sezinip otyr.
Jańa jýrnaldyń ashylýy – óńirde atqarylǵan ıgi isterdiń zańdy jalǵasy. Taraz – qazaq tarıhynyń temirqazyǵy. Áýlıeata jerinde alǵashqy qaýymdyq órkenıetten bastap, ár dáýir jádigerlerin kóp kezdestiremiz. Áıtkenmen, bizde tarıhqa tereń boılaıtyn mamandar tapshy ekeni ras. Sondyqtan jańa jýrnal ujymy aldaǵy ýaqytta bilikti zertteýshilermen tize qosyp jumys istep, oqyrman yqylasyna bólenedi degen senim zor», dedi jazýshy-dramatýrg Elen Álimjan.
Is-shara sońynda Prezıdent keńesshisi Málik Otarbaev, qalamgerler Elen Álimjan, Pernebaı Dúısenbınniń qatysýymen jańa jýrnaldyń tusaýy kesildi. Aıyna bir ret jaryq kóretin jýrnaldyń bas redaktory qyzmetine áriptesimiz Marjan Raqaı kiristi.
Taraz
