Foto: Vıdeodan alynǵan skrın
Sherzat Polattyń ólimine qatysty iste 9 aıyptalýshy bar, onyń ishinde 1 azamat kámelet jasyna tolmaǵan.
Búgingi sot otyrysynda 3 qazan kúni keshki kezekshilikte bolǵan Talǵar aýdandyq polısııa basqarmasynyń qyzmetkeri D. Quramysov kýálik etti.
Onyń aıtýynsha, Mendeleev kóshesindegi «Qamajaı» dúkeni mańyndaǵy tóbeles týraly habar polısııaǵa saǵat 00:42 -de túsken.
«Habarlanǵannan keıin 7-8 mınýtta oqıǵa ornynda boldyq. Oqıǵa jeke telefonǵa habarlandy. Oqıǵa ornynda 4-5 bala júrdi. Ne bolǵanyn suradyq. Bir balanyń basy qanap turdy. Jedel járdem shaqyryp kúte tur dedim. Sol jerde úlkender, turǵyndar tóbeles bolyp, myltyqtyń daýysy estilgenin aıtty», dedi kýáger D. Quramysov.
Sondaı-aq, kýáger polısııa qyzmetkeri D. Quramysov oqıǵaǵa qatysqandardy ustaý týraly habar alyp, Rysqulov aýylynda Volsvagen golf kóligi qalaı tabylǵanyn aıtyp berdi.
«Volsvagen golf kóligi Rysqulov aýylynda tabyldy. Biz kelgende ishinde eshkim bolmady. Keıin Darhan Askentaı úılerdiń arasynan shyqty. Kelgende Volsvagen golf kóliginiń artqy jáne aldyńǵy terezeleri synǵanyn kórdik. Darhan Áskentaıdan alkogoldik ishimdik ıisi shyǵyp turdy. Bir kózi kógerip, isken edi. Mendellev kóshesindegi «Qamajaı» dúkeni mańyndaǵy tóbeleske qatysy bar-joǵyn suradyq. Ol qatysy bar ekenin aıtty», dedi Talǵar aýdandyq polısııa basqarmasynyń qyzmetkeri D. Quramysov.
Qazir sot otyrysynda jeltoqsan aıynda denesi tabylǵan marqum Nurqanat Ǵaıypbaevtyń tergeýdiń bastapqy kezeńinde bergen túsiniktemesi kórsetilip jatyr.
