Halyq dıplomattary álemniń 14 memleketinde – Germanııa, Fransııa, О́zbekstan, Reseı, Argentına, Ázerbaıjan, Qyrǵyzstan, Polsha, Túrkııa, Bolgarııa, Tájikstan, Armenııa, Koreıa elderinde qyzmet etip júr. Olar sol memleketterde beıbitshilik pen kelisimniń otandyq úlgisin tanystyryp, ózge halyqtarmen ózara yntymaqtastyqty damytýǵa úles qosyp jatyr. Dostyq elshileri – halyqtar arasyndaǵy yntymaqtastyqty nyǵaıtýǵa úles qosyp júrgen bedeldi memleket jáne qoǵam qaıratkerleri.
2018 jyly QHA Keńesiniń sheshimimen alǵashqy Dostyq elshileri taǵaıyndaldy. Máselen, Reseı Federasııasynyń kórnekti memleket jáne qoǵam qaıratkeri Rýslan Aýshev, Germanııa Býndestaginiń eks-depýtaty Genrıh Sertık jáne Argentınadaǵy (Rosarıo q.) qazaq mádenı ortalyǵynyń jetekshisi Irına Vagner qazaq mádenıetin, tarıhyn ózge ulttarǵa nasıhattap, etnosaralyq qatynastardy úılestirýde jáne beıbitshilik pen kelisim saıasatyn ilgeriletýde elimizdiń tájirıbesimen bólisken naǵyz eldiń janashyr dostary boldy.
Fransııadaǵy elimizdiń Dostyq elshisi – qoǵam qaıratkeri, kásipker Malgojata Oboron-Týar da 30 jyldan beri tyǵyz dostyq qarym-qatynas quryp keledi. Ol alty jyldan beri QHA Dostyq elshisi qyzmetinde eki el arasyndaǵy kóptegen ekonomıkalyq jáne mádenı birlesken jobaǵa bastamashy bolyp, qoldaý kórsetti. Máselen, alǵashqylardyń biri bolyp qazaqtyń kókpar oıynyn tamashalaǵan fransýzdar boldy. Osydan 3-4 jyl buryn Fransııada kókpar týrnıri men Parıj galereıasynda qazaq kókpary týraly kórme uıymdastyryldy. Dostyq elshisi kelisim men birliktiń otandyq úlgisin keńinen nasıhattaýdy da josparlap otyr.
– QHA úlgisi – biregeı. Bul – túrli dástúr men til toptaryndaǵy adamdardyń bir-birin qalaı túsine alatynynyń naǵyz mysaly. Muny saıası júıeniń eń tolerantty quraly dep sanaımyn. О́ıtkeni bizdiń álem – óte kúrdeli ári názik. Búgin biz tepe-teńdikti buzyp, alaýyzdyq otyn jaǵýdyń qanshalyqty ońaı ekenin anyq kórip otyrmyz. Strategııalyq máseleler boıynsha tıimdi pikirtalasqa qol jetkizý úshin saıası jáne ınstıtýsıonaldyq salalardyń, ekonomıkalyq ortanyń jáne ıdeıalar áleminiń toǵysqan jerinde dıalog alańdaryn qurý óte mańyzdy. Qazaqstan osy máselede kóshbasshy bolyp tur. Ortalyq Azııa elderi týraly habary az Batys BAQ-tarynda el týraly, jalpy Ortalyq Azııany áli de kóptep nasıhattaýymyz kerek, –dedi Fransııadaǵy Dostyq elshisi.
Jalpy, Dostyq elshileri shetelderde el mádenıetin tanytatyn festıval, kórme, konferensııalar ótkizýge yqpal etedi. Mádenıetaralyq dıalog pen yntymaqtastyqty damytýǵa baǵyttalǵan halyqaralyq bastamalardy iske asyrýǵa qatysady.
Osyndaı mártebeli jumysty atqaryp júrgen tájik mesenaty, QHA Dostyq elshisi Aqbar Asadýlloǵa QHA-nyń 30 jyldyǵyna arnalǵan Qazaqstan halqy Assambleıasynyń kezekti XXXIV sessııasynda Qasym-Jomart Toqaev Qazaqstan men Tájikstan halyqtarynyń arasynda dostyqty, etnostaralyq birlik pen kelisimdi nyǵaıtýǵa qosqan eleýli úlesi úshin Qurmet gramotasyn tapsyrdy.
Osylaısha, halyq dıplomattarynyń qyzmeti qaı kezde de mańyzdy bolyp qala beredi.
