Ol – QR Ulttyq ulany Bas qolbasshylyǵynyń Arnaıy jáne áskerı tasymaldar ortalyǵynyń ofıseri. Onyń ómir joly – Otanǵa qyzmet etýdi mamandyqtan joǵary qoıǵan jas ofıserdiń taǵdyr joly.
Áskerı qyzmetshiler otbasynda dúnıege kelip, balalyq shaǵyn Saryózek garnızonyndaǵy áskerı qalashyqta ótkizdi. Qatar-qatar tizilgen kazarmalar men sap alańdary onyń azamattyq beınesin qalyptastyrdy. Garnızon turǵyndarynyń tatýlyǵy, bir-birine degen qoldaýy, ortaq qýanysh pen qıyndyqty birge eńserýi onyń jadynda tereń iz qaldyrdy. Dostarynyń deni – ofıser balalary edi. Bala kúninen tártipke baǵynyp, jaýapkershilik pen eńbekqorlyqty boıyna sińirdi.
Kún tártibimen ómir súrip, sportpen aınalysý, úı ishindegi rettilik pen qaryndasyna qamqorlyq tanytý – onyń kúndelikti ádetine aınaldy. «Bolam degen balanyń on besinde basy piser» degendeı, ata-anasynyń qyzmettegi ýaqyty kóp bolǵandyqtan, ol erte eseıip, ómirlik daǵdylardy erte meńgerdi.
15 jasynda ol bolashaǵy týraly baıyppen oılana bastaǵan. Sol kezde áskerı baǵyttaǵy arnaıy oqý orny – «Arystan» lıseıi týraly estip, armanyna aınaldy. Ashyq esik kúni lıseıge barǵan Qasymjomart tártip pen bilim úılesken erekshe ortadan aıryqsha áser aldy. Arhıtektýrasy, ornalasýy, áskerı tártip pen oqytý sapasy ony jigerlendirdi.
«Arystanǵa túsý ońaı bolǵan joq. Munda bilimmen qatar, ishki tártip, tózimdilik pen moraldyq daıyndyq baǵalandy. General-maıor S.S.Taýlanovtyń jetekshiligimen biz bilim ǵana almaı, tulǵa retinde de qalyptastyq. Osy jerde jaqsylyq pen jamandyqty aıyrýdy, ar-namys pen dostyqty baǵalaýdy, úlkenge qurmet pen ustanymǵa adal bolýdy úırendim», deıdi ol.
«Arystandy» bitirgen soń, Qasymjomart Reseıdiń Sankt-Peterbýrg qalasyndaǵy A.V.Hrýlıov atyndaǵy Materıaldyq-tehnıkalyq qamtamasyz etý áskerı akademııasynyń Áskerı qatynas jáne temirjol áskeri ınstıtýtyna oqýǵa túsip, ony úzdik dıplommen támamdady. Bul jetistik onyń bilimge, tártipke, kásibı daıyndyqqa degen joǵary talaptarynyń kórinisi boldy.
Týǵan eline oralǵannan keıin ol Astana qalasyna joldamamen kelip, Ulttyq ulan sapynda qyzmet atqara bastady. Búginde ol – qyzmetine shynaıy adal jas ofıser. Áskerı formasyn maqtanyshpen kıip, ár kúnin el tynyshtyǵy jolyndaǵy mindetine arnaıdy.
«Ulttyq ulan – jaýyngerlik januıa. Munda jas ofıserlerdi qyzmettiń qyr-syryna baýlıdy. Ásirese, jaýyngerlik qyzmet Bas basqarmasynda ishki qoldaýdy anyq sezinesiń. Áriptesterime jáne basshylyqqa alǵysym sheksiz», deıdi leıtenant Qasymjomart.
Búginde onyń eń jaqyn dostary – «Arystan» lıseıindegi synyptastary. Jyldar men synaqtardan ótken sol dostyq – naǵyz baýyrlastyqqa aınalǵan.
Qasymjomart Rahymjan óz ornyn tapqanyna senimdi. Qatardaǵy árbir kúni – tańdaǵan jolyna degen adaldyǵynyń aıǵaǵy. Ol otbasyna, ustazdaryna, tárbıelegen komandırlerine shyn júrekten alǵys bildiredi.
Onyń isi – qyzmet etý, maqsaty – qorǵaýshy bolý, bolashaǵy – paryzǵa degen adaldyqta tur. Qasymjomart sekildi jas ári bilimdi ofıserler kóp bolsa, elimizdiń irgesi berik, kók týymyz máńgi jelbireri anyq.
7 mamyr – Otan qorǵaýshylar kúni qutty bolsyn!
Daryn Seıitov,
podpolkovnık
