Sýretti túsirgen – Erlan OMAR, «EQ»
Iá, biz – batamen kógergen elmiz. Ataly sózge toqtap, bir kúnniń ǵana emes, arǵy-bergi bolashaǵymyzdyń qamymen qareket qylǵan elmiz. Jyr alyby Jambyl aıtpaqshy, «Jigerli bolsa, er bolar, birlikte bolsa, el bolar» degen danalyq sózdiń qasıetin uǵynyp, yntymaqqa umtyldyq. Ásilinde, el ishi ala taıdaı búlinip, birlikten ketse, áleýmettik-ekonomıkalyq áleýetimiz damymaq turmaq, táýelsizdigimiz ben turaqtylyǵymyzdy ustap turý ońaıǵa soqpas edi.
Halyq birligi demekshi, bul – kez kelgen memlekettiń kúretamyry, onyń irgetasyn qalap, bolashaqqa bastar berik baǵdary. Beıbitshilik pen turaqtylyqty, yntymaq pen kelisimdi ulttyń eń úlken baılyǵy retinde baǵalaıtyn memleketimiz bul baǵytta zor jetistikke qol jetkizdi. Qoǵamdyq kelisimdi tý etip ustaný arqyly ǵana biz bolashaqta qýatty, órkenıetti, damyǵan memleket qurý jolyndaǵy uly murattarymyzdy iske asyra alamyz.
Qoǵamdaǵy birlik pen kelisim – Táýelsizdigimizdiń myzǵymas tuǵyry. Bul – jaı sóz emes, ýaqyt pen tájirıbe dáleldegen tarıhı aqıqat. Osy turǵydan alǵanda, el ómirindegi mańyzy asa zor saıası qurylym – Qazaqstan halqy Assambleıasy qoǵamdyq birliktiń rámizine aınaldy. El Prezıdenti tóraǵalyq etetin bul ınstıtýt shırek ǵasyrdan asa ýaqyt boıy halyqty ortaq maqsatqa jumyldyryp, eldiń ishki turaqtylyǵy men damý úderisine súbeli úles qosyp keledi.
Memleket basshysy Qasym-Jomart Toqaevtyń jýyrda ótken Qazaqstan halqy Assambleıasynyń 30 jyldyq mereıtoıyna arnalǵan saltanatty jıynda «Birlik uǵymy qazirgi dúnıe júzindegi turaqsyz jaǵdaıda asa mańyzdy. Álemde, ásirese, bizdiń aınalamyzdaǵy keıbir elderde ne bolyp jatqanyna bárimiz kýá bolyp otyrmyz. Sondyqtan shyn máninde, «Birlik bar jerde ǵana tirlik bar». Bul – aqıqat», degeni el bolashaǵynyń baıandy bolýynyń qamy emes pe?
Birligimizdiń basty sımvoly bolyp otyrǵan Assambleıanyń basty ereksheligi – eldegi barlyq etnosty birtutas azamattyq qoǵam aıasyna, ıdeologııalyq ınstıtýttyń shańyraǵy astyna biriktirip, olardyń mádenı, tildik, dinı erekshelikterin saqtaı otyra damýyna múmkindik bergendiginde. Qazirgi tańda elimizde turyp jatqan etnostardyń mádenı ortalyqtary, tili men dinin damytýǵa arnalǵan 500-den asa etnomádenı birlestik jumys isteıdi.
Prezıdent Qazaqstan halqy Assambleıasynyń «Birlik. Jasampazdyq. О́rleý» atty HHHIII sessııasynda sóılegen sózinde elimiz qarqyndy damýy úshin ondaǵan jyl boıy qordalanǵan kóp máseleni sheshýimiz qajettigin basa aıtty. Al ol úshin halyqtyń kúsh-jigerin ortaq múddege biriktirý, bir maqsatqa baǵyttaý aýadaı qajet dúnıe ekenin eske saldy.
«Biz kúsh-jigerimizdi biriktirý arqyly ǵana bolashaq jetistikterdiń berik tuǵyryn qalap, saıasatta, ekonomıkada, mádenıette jáne áleýmettik salada túbegeıli ózgerister jasaı alamyz», deı kele Memleket basshysy dál sol sebepti Assambleıa sessııasynyń «Birlik. Jasampazdyq. О́rleý» dep atalǵanyn atap ótti. «Sizder munyń ózekti ekenin túsinesizder dep oılaımyn. Qazaqstan halqy Assambleıasynyń ǵana emes, barsha halqymyzdyń strategııalyq baǵdarynyń túpki mánin osy úsh uǵym dál ári naqty bildiredi. Basty mıssııamyz – jasaý, qurý, júzege asyrý. Birlik pen yntymaq basty qundylyǵymyz ári memlekettik saıasattyń buljymas baǵdary bolyp qala beredi», dedi Qasym-Jomart Toqaev.
Assambleıa bastamasymen búginde 40-tan asa Dostyq úıi men qoǵamdyq kelisim ortalyqtary el birligine qyzmet etip keledi. Bul mekemeler tek etnosaralyq dıalog alańy emes, sonymen qatar jastardy tárbıeleý, quqyqtyq saýatty arttyrý, medıasııany damytý sııaqty mańyzdy áleýmettik mindetterdi de iske asyrady.
Qazaqstan halqy Assambleıasynyń arqasynda etnostyq jáne dinı ereksheligine qaramastan, árbir azamattyń Konstıtýsııamen bekitilgen quqyqtary men erkindikterin tolyq paıdalanýyna jaǵdaı jasaldy. Bul – elimizdegi etnosaralyq ári konfessııaaralyq kelisimniń aıryqsha úlgisi, halyqaralyq qaýymdastyq tarapynan da moıyndalǵan tájirıbe.
Assambleıa etnosaralyq qatynastar salasynda memlekettik organdar men azamattyq qoǵam ınstıtýttary arasyndaǵy tıimdi ózara is-qımyldy qamtamasyz etetin negizgi tetikke aınalyp otyr. Bul óz kezeginde ulttyq qaýipsizdiktiń mańyzdy quramdas bóligi retinde baǵalanady. Mine, osyndaı birlik pen kelisim joly – elimizdiń tabysty damýynyń basty kilti bolyp otyr. Osy qundylyqtardy saqtap, urpaq sanasyna sińire bilsek, keleshegimiz kemel, memleketimiz qýatty bolmaq.
