Foto: Astana qalasynyń ákimdigi
«Is-shara aıasynda elimizde turatyn túrli etnostardyń mádenıeti men ónerin kórsetetin arnaıy kórme ótip jatyr. Túrli ult ókilderi kórmege kelýshilerge salt-dástúrin, mádenıetin, ulttyq taǵamdaryn pash etedi. Odan keıin bul shara merekelik konsertpen jalǵasady. Sonymen qatar biz shaqyrylǵan qazaq estradasynyń ánshisi Ushqyn Jamalbek jáne «Jastar» saraıynyń shyǵarmashylyq ujymy óner kórsetedi. Sondaı-aq Jumysshy mamandyqtary jyly men Jeńistiń 80 jyldyǵyna arnalǵan arnaıy shyǵarylymdar bar», dedi «Jastar» saraıynyń BAQ bóliminiń basshysy.
Búgingi sharany Astana qalalyq Mádenıet basqarmasy uıymdastyryp otyr.
Merekelik konsertte «Daryn» memlekettik jastar syılyǵynyń laýreattary Zarına Bojaqova, Álibek Álmadıev jáne Tatıana Kım, sondaı-aq sharanyń arnaıy qonaǵy Qurmash Mahan óner kórsetedi.
«Qazaqstan halqynyń birligi kúni – túrli etnos ókilderi bir shańyraq astynda tatý-tátti ómir súrip jatqan beıbit jáne myzǵymas memlekettiń sımvolyna aınalǵan mereke, bul ulttyq birligimizdiń beriktigin, kópultty qoǵamymyzda ózara syılastyq pen senimniń tereńde jatqanyn kórsetedi», dep atap ótti «Jastar» saraıynyń BAQ bóliminiń basshysy Dilnaz Murat.
Kórme qoǵamdaǵy dostyq pen kelisimdi nyǵaıtýǵa jáne ulttyq salt-dástúrdiń baı murasyn nasıhattaýǵa arnalǵan.
