«Kids Go Free» jobasy 2022 jyldan bastap iske qosylǵan. Onyń aıasynda kámeletke tolmaǵan balalardy áýe arqyly tegin tasymaldaý múmkindigi qarastyrylǵan. Ol úshin ata-analar nemese zańdy ókilder Qazaqstan aýmaǵyndaǵy resmı týroperatorlardan týrıstik paket satyp alýy tıis.
Jobanyń taǵy bir mańyzdy ereksheligi – «Kids Go Free» baǵdarlamasyn tek týrıstik operatorlar men sala mamandarynan arnaıy týr satyp alǵan jaǵdaıda ǵana paıdalaný múmkin bolady. Eger otbasy óz betinshe saparǵa shyqsa, onda bul jeńildik qarastyrylmaıdy. Sondyqtan bul múmkindikti paıdalaný úshin mindetti túrde resmı týr paketin alý qajet.
Baǵdarlamaǵa qatysý sharttary:
- Balanyń jasy 2–17 jas aralyǵynda bolýy jáne Qazaqstan Respýblıkasynyń azamaty bolýy kerek;
- Bala ata-anasymen nemese jaqyn týystarymen (atasy, ájesi, aǵasy, ápkesi) birge sapar shegýi qajet;
- Týrıstik paketti satyp alý kezinde balalardyń áýe bıletteriniń quny týroperator esebinen tólenedi, keıin bul shyǵyn memleket tarapynan óteledi.
Týrıstik paket satyp alý úshin qosymsha qujat jınaýdyń qajeti joq. Qatysý tártibi mynadaı:
- Demalysty josparlap, baǵytty tańdaý;
- Tańdalǵan baǵyt boıynsha týrıstik kompanııaǵa júginip, paket rásimdeý;
- Balalardyń ushý bıletterin esepke alyp, tolyq týrıstik paketti tóleý;
- Saıahatqa shyǵý;
- Demalys aıaqtalǵan soń, týroperatorǵa ushaqta berilgen jolaýshy talonyn tapsyrý.
Týrızm jáne sport mınıstrliginiń saýalymyzǵa bergen jaýabyna súıensek 2025 jyldyń basynan beri 176 bala Qazaqstannyń týrıstik aımaqtaryna tegin ushý múmkindigine ıe bolǵan. Jalpy 2022-2024 jyldar aralyǵynda 5,5 myńnan asa bala osy baǵdarlamany qoldanǵan.
«Ishki týrızm boıynsha saparlardy uıymdastyrýǵa lısenzııasy bar týroperatorlardan satyp alynatyn týrǵa engizilgen 2 jastan 17 jasqa deıingi balalar úshin bılettiń quny sýbsıdııalanady. Osy baǵdarlamaǵa qatysýdyń mindetti sharty týroperatordan otbasyǵa arnalǵan týr satyp alý bolyp tabylady. Baǵdardama aıasynda týroperator balalar úshin avıabıletterdi óz esebinen satyp alýdy kózdeıdi, keıinnen balalardyń avıabıletteriniń shyǵystary sýbsıdııalanady», dep túsindirdi mınıstrlik.
Erejege sáıkes týroperator kelesi qujattardy tapsyrýy qajet:
- týroperatorlyq lısenzııa;
- salyq komıtetinen bereshektiń joqtyǵy týraly anyqtama;
- balalar men ata-analardyń qujattary;
- týrıstpen jasalǵan shart, avıabıletter.
Aıta keteıik, ishki týrızm boıynsha lısenzııasy bar kez kelgen týroperatorlar osy baǵdarlamaǵa qatysýǵa quqyly.
