Foto: Qorǵanys mınıstrligi
Zań jobasy memlekettik (onyń ishinde áskerı) avıasııanyń tek memlekettik emes, jeke tapsyrys berýshilerge de júk tasymaldaý qyzmetin kórsetýine múmkindik beredi. Mundaı tájirıbe Ulybrıtanııa, Germanııa, Túrkııa, Egıpet, Reseı, Belarýs jáne Ońtústik Koreıa sekildi elderde bar jáne bul ICAO (Halyqaralyq azamattyq avıasııa uıymy) standarttaryna sáıkes keledi.
Áskerı qurylymdarǵa ózderiniń negizgi qyzmetine kedergi keltirmegen jaǵdaıda aqyly negizde tasymaldaý qyzmetin kórsetýge ruqsat beriledi. Tasymaldaý kommersııalyq negizde nemese jattyǵý ushýlary kezinde ilespe baǵyttar arqyly júzege asyrylýy múmkin.
Kútiletin artyqshylyqtar:
- Áýe tehnıkasyn ustaý men jóndeýge ketetin shyǵyndardyń bir bóligin jabý;
- Memlekettik bıýdjetke qosymsha kiris túsýi;
- Memlekettik shyǵyndardyń azaıýy;
- Alys aımaqtardyń logıstıkasyn jaqsartý;
- Tasymalǵa tartylǵan áskerı qyzmetkerlerdi yntalandyrý.
Qaýipter men táýekelder:
- Jeke quramǵa túsetin júktemeniń artýy;
- Qosymsha saqtandyrý shyǵyndary;
- Azamattyq avıakompanııalarmen básekelestik shekteýli bolýy múmkin;
- Memlekettik mindetterge basymdyq saqtalady.
Vedomstvonyń málimetinshe, 2028 jylǵa qaraı memlekettik avıasııa arqyly júk tasymaly kólemi 12,1%-ǵa, al 2030 jylǵa qaraı 24,2%-ǵa artady. Sonymen qatar, áskerı avıasııany damytýǵa salynatyn ınvestısııalar 2028 jylǵa deıin 100%-ǵa, al 2030 jylǵa deıin 120%-ǵa ósýi múmkin.
Qazirgi tańda Qazaqstan Qarýly Kúshteri 15 áskerı-kólik ushaǵyn paıdalanyp otyr. Olardy ustaý men jóndeýge jyl saıyn shamamen 7 mlrd teńge bólinedi, alaıda bul qarjy tehnıkany ýaqtyly jańartýǵa jetkiliksiz.
