Foto: Vıdeodan alynǵan kadr
Oqıǵa sáýir aıynyń basynda Ordabasy aýdany, Uıalyjar aýyldyq okrýgi aýmaǵynda bolǵan. Jelide taraǵan vıdeoda belgisiz áıel sırek kezdesetin Greıg qyzǵaldaǵyn julyp jatqany kórsetilgen. Keıinnen polısııa onyń jeke basy men Shymkentten kelgenin anyqtaǵan.
Qazirgi ýaqytta áıelden elden ketpeý jáne tıisti tártipti saqtaý týraly qolhat alynǵan. Ol kinásin tolyq moıyndaǵan.
Aıta keteıik, is boıynsha sot saraptamasy taǵaıyndalyp, gúlderdiń rasymen Qyzyl kitapqa engen túrge jatatyny anyqtalǵan.
Atalǵan áreket QR Qylmystyq kodeksiniń 339-babynyń 1-bóligi boıynsha qaralyp jatyr. Bul bap boıynsha 3000 AEK-ke deıin aıyppul (2025 jyly shamamen 12 mln teńge), 800 saǵat qoǵamdyq jumys nemese 3 jylǵa deıin bas bostandyǵynan aıyrý jazasy qarastyrylǵan.
Greıg qyzǵaldaǵy (Tulipa greigii) — Qazaqstanda, ásirese Tıan-Shan men Qarataý taýlarynda ósetin erekshe jáne sırek ósimdik. Bul gúl erte kóktemde (sáýirde) gúldeıdi. Gúlderi iri, ashyq qyzyl nemese qyzǵylt tústi, japyraqtary kúlgin jolaqtarmen kómkeriledi. Bıiktigi 20–40 sm, dıametri 15 sm-ge deıin jetýi múmkin.
Greıg qyzǵaldaǵy birneshe eldiń Qyzyl kitabyna engizilgen, sebebi tabıǵı ortada joıylyp bara jatqan gúlderdiń túrine jatady. Oǵan mekendeý oryndarynyń buzylýy, adamdardyń tym kóp jınaýy jáne baıaý tabıǵı kóbeıýi sebep.
